‘E lē toe talitonuina ‘e Saina Niu Sila pe ‘ā ‘āuai ‘i le AUKUS – lapata’iga ‘a le ‘amepasa ‘o Saina ‘i Niu Sila

‘I se fa’atalanoaga ‘a Gyon Espiner ‘o le Leitiō Niu Sila ma le ‘amepasa ‘o Saina ‘i Niu Sila, Dr Wang Xiaolong, sa lapata’i ai ‘e le ‘amepasa le mālō ‘o Niu Sila, ‘e mafai ‘ona soloia le talitonuga ‘o Saina ‘iā Niu Sila, pe ‘ā fai ‘e ofi atu ‘i le fa’alāpotopotoga ‘o le AUKUS.  ‘O le ‘ā āfāina ai le so’otaga ‘i le vā ‘o atunu’u ‘e lua. 

‘O le mafutaga ‘a Ausetalia, Peretānia ma Amerika ‘i le tūlaga tau ‘i le puipuiga, lea ‘ua ta’ua ‘o le AUKUS, sā vala’auliaina Niu Sila ‘ina ‘ia ‘āuai ‘i le vāega lua po’o le Pillar Two ‘o fa’agāsologa ‘o polokalame ‘a lea fa’alāpotopotoga, ‘e māta’itū le fefa’asoaā’iga ‘o le tēkonolosi ‘e militeli ‘e lē fa’aaogāina ai le niukilia. 

Peita’i na saunoa Dr Wang, ‘o le AUKUS ‘o lo’o aofia ai le fefa’asoaā’iga ‘o mea ‘e gaosi ai ‘au’upega niukilia mai se atunu’u ‘e fa’aaogāina ‘au’upega niukilia, ‘i se mālō ‘e lē fa’aaogāina ni ‘au’upega niukilia mō le taimi muamua ‘i le tala fa’asolopito.  ‘Ā fai ‘ae tupu lea tūlaga, ‘o le ‘ā lagalagā ai ni fesili ogaoga ‘e uiga ‘i le fa’amāoni ‘i le feagaiga ‘o le Non-Proliferation Treaty po’o le feagaiga fa’avāomālō ‘e puipuia ai le fa’aaogaga tele ‘o le tēkonolosi ‘o ‘au’upega niukilia. 

Link to RNZ (Article) translated by Savelina Kasiano: https://www.rnz.co.nz/news/political/534897/chinese-ambassador-to-nz-warns-that-joining-aukus-could-erode-china-s-trust

ATA: Wang Xiaolong. Photo: RNZ / Samuel Rillstone