‘E lē tatau ona tupu: ‘E ātili tele ai isi tete’e pe ‘ā fa’asala tagata faigāluega ‘ona ‘o tete’e-CTU

Na fa’ailoa ‘e le Minisitā ‘o Matā’upu ‘i Fale faigāluega, le tama’ita’i faipule ‘o le ACT, Brooke van Velden ‘i le aso ananafi, ni fuafuaga ‘e toe ‘āmata ai le fa’aitīitia ‘o totogi pe ‘ā ‘āuai ‘i ni itū’āiga tete’e ia ‘e faigāluega lava ‘ae fa’aavanoa se taimi ‘o le aso ‘e fa’atino ai le tete’e (partial strikes).  Sā fa’asāina fale faigāluega, mai le fa’aitīitia ‘o totogi ‘o se tagata faigāluega talu mai ‘ona ‘ave’esea ‘e le faigāmālō ‘a le Labour lea mālosi’aga ‘i le 2018.

Na saunoa Van Velden, ‘e talafeagai le fuafuaga ‘a le mālō ‘ona ‘o fa’afītāuli ‘e tutupu mai ia itū’āiga tete’e.  ‘O nisi ‘o fa’ata’ita’iga talu ai nei ‘o ia fa’afītāuli, lea sā va’aia ‘i falema’i ‘iā ‘Aukuso, na fa’atapula’aina ai siaki ‘o le MRI ‘i le aso, ‘e ‘i lātou ‘e gālulue ai; sā fa’alavelaveina fo’i a’oa’oga ‘a fānau ‘i le tausaga talu ai ‘ona ‘o tete’e fa’apea ‘a faiā’oga, ‘o ‘aufaigāluega ‘a le Puipuiga fa’apea fo’i ma ‘ave nofoāafi ‘i Uēligitone ‘i le māsina ‘o Sētema.

Peita’i na saunoa le peresetene lē tūmau ‘o le Pūlega ‘o Iuni ‘a tagata faigāluega, Rachel Mackintosh, sa faigāluega ma ‘āuai ‘i tete’e, (work to rule) sā gālulue lava ma fa’amāe’a a lātou gāluega ‘e pei ‘ona māsani ai.  ‘Ae ‘ā fai lā ‘o le ‘ā fa’ataga fale faigāluega ‘e tō’ese totogi ‘o tagata faigāluega, ‘o le fa’ataga fo’i lea ‘o ‘i lātou ‘e lē totogia tagata ‘o lo’o gālulue.  ‘O ia fo’i itū’āiga tete’e (partial strike), ‘o se ‘auala ‘ua iai ‘ona tapula’a, ‘e taumafai ‘e maua ai se māliliega ‘a fale faigāluega ma a lātou tagata faigāluega.  Na saunoa Mackintosh, fa’ato’ā tete’e lava tagata pe ‘ā fai ‘ua lē mafai ‘ona ‘ausia se māliliega ‘i taimi ‘e faia ai fa’atalanoaga mō ni tu’utu’uga talafeagai ‘i ā lātou gāluega, ma ‘e lē tu’umāmāina ‘e tagata faigāluega ia tūlaga.

Na saunoa Mackintosh, ‘o saunoaga ‘a le minisitā, ‘ua fa’ailoa ai, le fa’alagolago tele ‘o fale faigāluega ‘i gāluega lē totōgia ma taimi ofo fua ‘a tagata faigāluega ‘ina ‘ia ‘ausia o lātou fa’anaunauga fa’atūlagaina mā ‘o le isi lea fa’ata’ita’iga ‘o gāioiga ‘a le faigāmālō so’ofa’atasi, ‘e fa’aitīitia ai aiā tatau ‘a tagata faigāluega.

Link to RNZ (Article) translated by Savelina Kasiano: https://www.rnz.co.nz/news/political/536270/it-shouldn-t-happen-punishing-employees-for-working-to-rule-will-lead-to-more-strikes-ctu

ATA: RNZ / Nate McKinnon.