‘E lē tatau ‘ona tele lavelave ‘i tōgiga ā’oga ‘ina ‘ia fa’aitīitia ai tau

‘Ua taugatā tele le tau ‘o tōgiga ā’oga, mā ‘ua iai nisi tōgiga ‘ua o’o atu lava ‘i le ta’i $1000 peita’i, ‘ua ātili faigatā lava ‘i le tūlaga ‘o lo’o iai le tamāo’āiga ‘i le taimi nei pei ‘ona tā’ua ‘e se tagata su’esu’e ‘i le Iunivesitē ‘o Otago. 

‘O lea ‘ua latalata ‘i taimi ‘e toe ‘āmata ai ‘ā’oga ‘o lenei tausaga, ‘ae ‘ua fa’aalia fo’i finagalo ‘o nisi tagata, ‘e ā pe ‘ā toe liuliu se tōfā ‘i le tele ‘o lavelave ‘o tōgiga ā’oga.  Na tā’ua ‘e Johanna Reidy ‘i le Leitiō Niu Sila, ‘e tatau ‘ona ‘avea tōgiga ā’oga ma ‘auala ‘e ūna’iina ai tamaiti ‘e ō ‘i le ā’oga, ‘ae ‘aua ne’i ‘avea ‘o se itū ‘e poloka ai le ō ‘o tamaiti ‘i ā’oga.

‘E lelei ‘ona toe tō mānatu po’o le ā le māfua’aga na fai ai tōgiga ā’oga ‘i le ‘āmataga, ma sā fa’afaigōfie ai avanoa mō tamaiti ‘e lē lava le fa’asoa ‘a ‘āiga ‘e tusa ai ma se saunoaga ‘a Reidy.  Peita’i, ‘āfai ‘ua lē ō tamaiti ‘i ā’oga ‘ona ‘o le tau ‘o ‘ofu ā’oga, ‘ua tatau nei loa ‘ona toe māfaufau po’o le ā le isi la’asaga ‘e tatau ‘ona fai.

‘I lana su’esu’ega na iloa ai, le tāua ‘o le fai ‘o tōgiga ā’oga ‘e lē gata mō a’oa’oga ‘ae fa’apea fo’i ‘i le soifua mālōlōina, peita’i, ‘e mo’omia le fa’afaigōfie, ‘ina ‘ia fa’apa’ū ai fo’i le tau.  ‘E manatu Reid, ‘e tatau ‘i le mālō ‘ona fesoasoani ‘i ‘āiga ‘e maualalalo tupe maua ‘i le fa’atupega ‘o tau ‘o ‘ofu ā’oga ‘o tamaiti.

Link to RNZ (Article) translated by Savelina Kasiano: https://www.rnz.co.nz/news/national/538823/school-uniforms-should-be-less-complex-to-reduce-cost-researcher

ATA: Sāmoa Capital Radio (file).