‘E lē puipuia ‘e le faigāluega mai le fale tagata faigāluega mai fa’alavelave ‘e tutupu ‘i gāluega – mai ni fa’amaumauga fou

‘Ua fa’aalia ‘i ni fa’amaumauga ‘a le ACC, ‘e 200,000 le aofa’iga ‘o talosaga na tu’uina atu, sa totogi mō tagata na manunu’a ‘a’o faigāluega mai ‘āiga talu mai le ‘āmataga ‘o le 2019.  ‘Ua fa’aitīitia le aofa’iga ‘o talosaga fou, sa 35,896 ‘i le tausaga ‘e 2019 ‘ae ‘ua 35,336 ‘i le 2021, 30,711 ‘i le tausaga ‘e 2023 ma le 24,309 mai le tausaga talu ai ‘e o’o mai ‘i le taimi nei.  ‘O manu’aga ‘e māfua mai ‘i le tasī’iga ‘o ni mea mamafa lea ‘e pei ‘ona ta’atele ‘i ai, ma ‘e 6720 talosaga mō ia manu’aga na tu’uina atu mō lenei tausaga pei ‘ona fa’aalia ‘e le ACC po’o le ‘ōfisa ‘o taui ‘o fa’alavelave fa’afuase’i.  ‘E pito ‘i ai manu’aga ‘e māfua mai le lē pāleni ‘o le tū po’o le savali ma le nofo. 

‘E lata ‘i le 770 tagata ‘i le tausaga ‘e o’o mai ‘i le taimi nei na mānunu’a ‘ona ‘ua āfāina ponāivi ‘a’o faigāluega mai le fale.  ‘E lata ‘i le to’a 300 na mū.  ‘O le vāega pito ‘i lalo ‘o papātua ma le tuasivi, ‘e pito ta’atele lava ‘i vāega ‘o le tino ‘e mānunu’a, pito ai tama’i lima ma lima matua.  ‘E silia ma le 800 miliona tālā na fa’aaluina ‘i le ‘e fa’atupe ai togafitiga mō manu’aga ‘i tagata faigāluega mai totonu ‘o ‘āiga, mai le 2019 ‘e o’o mai ‘i le 2024.  ‘O le se’e, sulu po’o le pa’ū, ‘e pito sili ona tele tupe ‘e alu ai ‘ona ‘o manu’aga ‘i totonu ‘o Niu Sila. 

‘E tusa ma le 770,000 tagata Niu Sila ‘e mānunu’a ‘ona ‘e sūsulu, sēse’e, pe pa’u’ū ‘i so’o se tausaga, ‘ae ‘o le fale lava le nofoaga pito sili ‘ona ta’atele ‘e tutupu ai ia manu’aga.  Na fa’aalia ‘e Jim Roberts, ‘o se pā’aga ‘i le Hesketh Henry, ‘o le tiute māsani ‘a fale faigāluega sa iai ‘i lalo ‘o le Tūlāfono ‘o le Soifua Mālōlōina ma le Saogalēmū ‘i Fale faigāluega, ‘o le fa’amautinoa lea ‘o le saogalēmū ‘o tagata faigāluega peita’i, ‘e lē tatau ‘ona gata ‘i totonu ‘o fale faigāluega, ‘ae ‘ia aofia ai ma le faigāluega ‘i le fale.

Link to RNZ (Article) translated by Savelina Kasiano: https://www.rnz.co.nz/news/business/533698/working-from-home-does-not-protect-people-from-work-accidents-new-data-shows

ATA: RNZ