‘E fa’atupu vevesi tu’ua’iga ‘a Seymour ‘e fa’atatau ‘i tamaiti ā’oga ‘o ‘āuai ‘i le hikoi

‘O saunoaga ‘a David Seymour ‘e fa’apea ‘o lo’o una’i ‘e ā’oga a lātou tamaiti ‘e ‘āūai ‘i le hikoi po’o le solo tete’e ‘e fa’asaga ‘i le Pili ‘o le Treaty Principles Bill, ‘o ni fa’a’upuga fa’aoso ita ma fa’atupu vevesi, ‘e tusa ai ma se fa’amatalaga ‘a puleā’oga.  ‘O le vāiaso talu ai, na saunoa ai Seymour, le ta’ita’i ‘o le ACT ma ‘o le minisitā lagolago ‘o Ā’oga, ‘e iai ā’oga ‘ua āloa’ia lelei ‘ona lagolago ‘i le solo tete’e ‘e fa’asaga ‘i le pili, ‘o nisi ‘ua fa’atonu ni pasi mō le solo ma fa’ataga nisi ‘o tamaiti ā’oga ‘e fa’amisi a lātou su’ega.

‘O lo’o tu’uina atu fo’i ‘e le Matāgāluega ‘o Ā’oga ni ta’iala ‘e fa’amanatu ai ‘i ā’oga ma kura ‘e tatau ‘ona o lātou tū ‘i le ‘ōgātotonu.

Na saunoa le ta’ita’i ‘o le Fono ma le Fa’alāpotopotoga ‘a Puleā’oga ‘o Kolisi, Kate Gainsford, ‘e tele fautuaga na tu’uina atu ‘i ā’oga, ‘e le matāgāluega, Pūlega ‘o Fa’ailoga ‘i Ā’oga ‘a Niu Sila (NZQA) fa’apea ma leoleo, mā ‘o le tele lava ‘o ia fautuaga ‘e fa’atatau ‘i le puipuiga ma le saogalēmū, peita’i, ‘o saunoaga ‘a Seymour ‘i le itū ‘o lo’o lilifa ‘i ai le lagolago ‘a ā’oga, ‘o se saunoaga ‘e fa’atupu vevesi.  Na iai se pepa ‘o fa’amatalaga ‘a le Vāega Fa’a’upufai ‘a le ACT ‘i le vāiaso talu ai, sā ūna’ia ai mātua ‘ina ‘ia tusi ‘i komiti fa’atonu ‘a ā’oga ‘a a lātou fanau, ‘e fa’amanatu ‘i ai o lātou tiute, ‘o le lē fa’aitū’au ‘i lalo ‘o ta’iala ‘a ‘au’aunaga ‘a le mālō.  ‘E tatau fo’i ‘i mātua ‘ona iloilo pe tatau ‘ona toe filifilia ‘i totonu ‘o komiti fa’atonu a ā’oga a lātou sui.

Link to RNZ (Article) translated by Savelina Kasiano: https://www.rnz.co.nz/news/political/533984/treaty-principles-bill-seymour-s-allegations-around-students-taking-part-in-hikoi-inflammatory

ATA: RNZ / Marika Khabazi.