‘E ‘anagatā le itū’āiga fausaga ‘o le vaitā’ele, le Te Ngaengae

‘O le fa’anaunauga ‘o le vaitā’ele ‘o le Te Ngaengae Pool and Fitness, ‘ina ‘ia ‘avea ma vaitā’ele pito sili ‘ona ‘anagatā ‘i totonu ‘o Niu Sila pe ‘ā o’o ‘ina tatala āloa’ia ‘i le ‘āmataga ‘o Tēsema, ‘ona ‘ua matuā fa’aitīitia lava le kāpone ma laitiiti fo’i le paoa ‘e fa’aaogāina ai.  ‘O le ‘ā tatālia fo’i ‘a’afiaga mai suiga ‘o le tau ma fa’alavelave fa’alenātura, ‘ona ‘o lona fausaga ma le toe fa’amālosiga ātili ‘e tusa ai ma aiāiga ‘o fausaga ‘i aso nei ‘e fua ‘i mafui’e.

‘O le vaitā’ele tuai lea na iai ‘i Naenae, na tāpunia ‘i le 2019, ma ‘e 546 tone ‘o le kāpone po’o kasa ‘e leaga ai le si’osi’omaga, sa pua’ina atu ai ‘i tausaga ta’itasi, mai polokalame ‘e fa’amāfanafana ai ‘e maua mai ‘i le kesi ma le ‘eletise, ‘e tutusa ma le kāpone pe ‘ā alu le ta’avale ‘i le 3.28 kilomita ‘o ta’avale ‘e alu ‘i le tiso.

  ‘Ae ‘ua līpotia ‘e 56 pasene ‘o le ‘ā fa’aitīitia ai le kāpone mai le fa’aaogaga ‘o mālosi’aga nei ‘e pei ‘o le ‘eletise ‘i le vaitā’ele fou.  Na fa’aalia ‘e le pulenu’u Campbell Barry, ‘e mitamita ‘i le kāpone lea ‘ua fa’aitīitia mai le fa’aaogaga ‘o mālosi’aga ‘e pei ‘o le kesi ma isi.  ‘E 68 miliona tālā le tau ‘o le polōketi, ‘e aofia ai le 27 miliona tālā mai le mālō.

 Hutt City Council (Media Release) translated by Savelina Kasiano.

ATA: Hutt City Council