‘Ave’esea ‘e le New World ma le Pak’nSave le ‘upegatafā’ilagi ‘e fa’atusatusa ai tau ‘o ‘oloa

‘Ua ‘ave’esea ‘e supamāketi tetele ‘a le New World ma le Pak’nSave ni avanoa mō nisi ‘o tagata fa’atau ‘e mafai ai ‘ona o lātou fa’avasegaina tau ‘o ‘oloa ta’itasi, ma ‘o tala ‘a nisi ‘o tagata fa’atau, ‘o se gāioiga lē lelei.  ‘O se taimi muamua atu ‘i lenei lava māsina ‘o ‘Oketopa, na faia ai lea suiga, ma ‘ua fa’afaigatā ai mō tagata fa’atau, ‘ona su’e le ‘oloa pito taugōfie.  ‘Ua faitio nisi ‘e fa’apea, so’o se fa’amatalaga lava ‘e fesoasoani ‘i tagata ‘e fa’atusatusa ai tau ‘o ‘oloa, ‘o se tūlaga lelei tele.  Na tā’ua ‘e Sahar Lone ‘o le Consumer NZ, ‘e faigatā ‘ona mālamalama ‘i le uiga tonu ‘o lea gāioiga, ma sā faia ‘e le Foodstuffs po’o le Woolworths lea ‘upega’ofeso’ota’iga ‘e fa’avasega ai tau ‘o ‘oloa, ma ‘e lē māsani a’i le toe ‘ave’esea.

Mā ‘e fa’ate’ia fo’i ‘i lea gāioiga, ‘ona ‘e le’i leva atu nei se sā’ili’iliga ‘i le Foodstuffs ‘a le vāega su’esu’e ‘a le Komisi ‘e mata’itūina le mulimulita’ia ‘o le tūlāfono ‘o fefa’ataua’iga talafeagai po’o le Commerce Commission, fa’apea ai ma se līpoti ‘a le Consumer NZ, sā iloa ai, ‘o le popōlega pito telē lava ‘o tagata fa’atau, ‘o le tau sā’iliga lea ‘o tau ‘o ‘oloa.  ‘O se fa’amatalaga ‘a le Foodstuffs, ‘e fa’apea ‘o lo’o faia suiga ‘iā lātou ‘au’aunaga fa’atēkolosi ma fa’aleleia a lātou ‘au’aunaga ia ‘o lo’o fa’aaogāina ai le ‘initaneti ‘i fefa’ataua’iga ma fa’amanino ātili ai fo’i le faiga ‘o tau ‘o ā lātou ‘oloa.  ‘O lo’o fa’amoemoe ‘e o’o atu ‘i le ‘ōgātotonu ‘o Nōvema, ‘ua māe’a ‘ona fa’aleleia, ‘ae ‘o lo’o mafai lava ‘e tagata fa’atau ‘ona fa’aaogāina apps ‘a le Pak’nSave ma le New World ‘e su’e ma fa’atusatusa ai tau ‘o ‘oloa.

 Link to RNZ (article) translated by Savelina Kasiano: https://www.rnz.co.nz/news/national/532245/new-world-pak-nsave-removing-webite-sort-by-price-option-dodgy-shoppers

Ata: Facebook