‘Ave’esea Darleen Tana mai le Palemene.

Na faia ‘e le Fofoga Fetalai Gerry Brownlee le fa’asilasilaga ‘i le Aso Lua, ‘e ‘āloa’ia ai le ‘ave’esega ‘o le tama’ita’i faipule Darleen Tana mai le Palemene, ‘ina ‘ua tusi atu le Vāega Fa’a’upufai ‘a le Green ‘iā te ia, ‘e talosagaina ai le fa’aaogā ‘o le tūlāfono ‘o le waka-jumping.  Na tūto’atasi Tana talu mai le māsina ‘o Iūlai lea na ia tu’ua ai le Greens, peita’i sa musu ‘e fa’amāvae mai le Palemene.  Na fa’amālōlō lē tūmau mai le fa’afaletui ‘a le Green ‘i le māsina ‘o Mati, ‘i ni fa’afesili ‘e fa’atatau ‘i lona lē fa’ailoaina ‘o tu’ua’iga ‘e fa’asaga ‘i le pisinisi ‘a lona to’alua, ‘i le lē lelei lea ‘o le va’aiga ‘o tagata faigāluega mai fafo sā gālulue ai. 

Sa fa’aalia ‘e le isi ta’ita’i ‘o le Green, Chloe Swarbrick, na tutū fa’atasi sui ‘e toa 185 ‘o le Green, ‘o lo’o fai ma sui ‘o le faitau afe ‘o le vāega fa’a’upufai ‘i le atunu’u, ‘e ioeina le tu’u atu ‘o lea talosaga ‘i le Fofoga Fetalai, ma fa’aaogā ai le tūlāfono lea ‘e ta’ua ‘o le waka-jumping legislation, ‘e ‘ave’esea ai Tana.  Na iloga le tete’e ‘o le Green ‘i lea tūlāfono ‘i le taimi na ulua’i folasia ai ‘i le Palemene, ‘ona ‘e fa’apea ‘ua telē ai le mālosi’aga ‘i lima ‘o ta’ita’i ‘o vāega fa’a’upufai.  ‘Ua lē toe ‘avea nei Tana ma faipule ‘o le Palemene ‘o Niu Sila.  ‘Ua suitūlaga atu nei ‘i ai Benjamin Doyle, le isi tagata lea ‘o lo’o soso’o atu ‘i le lisi ‘a le Vāega Fa’a’upufai ‘a le Green.  

Link to RNZ (Article) translated by Savelina Kasiano: https://www.rnz.co.nz/news/political/531514/former-green-mp-darleen-tana-removed-from-parliament

Ata: RNZ / REECE BAKER Former Green MP Darleen Tana has officially been ejected from Parliament.