‘Ave’ese ‘e le Meta fact checking ‘e tutupu mai ai ni fa’afītāuli tetele

‘Ua fa’aleo le ātugaluga ‘o le ‘au fai tōfā ‘i suiga ‘o polokalame ma le tūlaga pei ‘ona fa’amuta ai le fact checking, po’o le siakiga ‘o ni fa’amatalaga po’o sa’o, ‘i luga ‘o ‘upega tafā’ilagi ‘a le Meta, ‘ona ‘o le ‘ā tu’uavanoa ai ‘i fa’amatalaga sesē ma sauaga ‘i luga ‘o feso’ota’iga fa’aonapō nei.

Na fa’asilasila ‘e le pule sili ‘o le kamupanī  lea ‘e ana le Facebook, Instagram ma le Threads, ni suiga ‘i le Aso Lua, ‘e fa’apea ‘o le ‘ā matuā suia ai lava le ‘auala ‘e fa’atūlaga ai fa’amatalaga ma tusitusiga, ‘e aofia ai lā ma le ‘ave’esea ‘o le polokalame ‘e siaki ai le moni ‘o fa’amatalaga, ‘ae sui atu ‘i ai ni tusitusiga ‘o community notes ‘e tali tutusa lava ma le faiga ‘o lo’o fa’aaogāina ‘e Elon Musk ‘i luga ‘o le X.

Na ‘ioe lava Mark Zuckerberg ‘i le ‘āmata va’aia ‘o nisi tusitusiga ma fa’amatalaga po’o ata ‘e āfāina ai isi, ‘i luga ‘o ia feso’ota’iga.  ‘O Community notes, ‘o le ‘ā mafai ai ‘e tagata ‘o fa’aaogāina ia ‘upega ‘o feso’ota’iga, ‘ona fa’aopoopo iai nisi tusitusiga ma fa’asa’oga.

Na fa’aalia ‘e Dr Sanjana Hattotuwa ‘o le Disinformation Project, ‘o le ‘ā matuā telē lava a’afiaga mō atunu’u ‘i fafo atu ‘o le Iūnaite Setete.

Link to RNZ (Article) translated by Savelina Kasiano:https://www.rnz.co.nz/news/national/538507/meta-removing-fact-checking-will-have-catastrophic-consequences-disinformation-expert

Ata: Google images