‘Avea ma KC le tama’ita’i loia Sāmoa – Tiana Epati

‘O le ‘avea ma King’s Counsel (KC), ‘o se tasi lea ‘o fa’aeaeaga pito maualuga ‘i le gāluega fa’alōia, ma ‘e i lalo ifo ‘o le 370 lōia ‘i Aotearoa Niu Sila ‘ua ‘ūmiaina lea fa’aeaeaga.  ‘O i  lātou sīnia ‘ua pito sili ‘ona ‘āto’atoa le fa’atinoga ‘o a lātou gāluega fa’alōia. 

Na fa’aalia ‘e le tama’ita’i lōia ‘o Tiana Epati, ‘ina ‘ua ia mauaina le vala’au mai le Lōia Sili, ma ta’u atu ‘iā te ia le ‘avea ai ma KC, na fa’ailogaina ai le isi taimi iloga ‘o lana gāluega fa’alōia.

‘Ua 20 tausaga ‘o galue ‘i le matātā fa’alōia, ma ‘ua fa’aata mai ai se faigāmalaga faifaipea na ‘āmata mai lava ‘i Sāmoa.  Na saunoa Tiana, ‘o ia na ola a’e ‘i Sāmoa.  ‘O lona tua’ā ‘o le Sāmoa, na soifua a’e ‘i le nu’u ‘o Sāle’imoa, ma mauaina se sikolasipi ‘e ā’oga ai ‘i Niu Sila, ma ‘avea ai fo’i ma lōia, ma sā manino lava le fa’aosofiaga mō ia ‘i le gāluega fa’alōia, ‘ona na va’ava’ai ‘i lona tamā, ‘e lē gata ‘i lana gāluega fa’alōia ‘i Sāmoa, ‘ae na fesoasoani ‘i ona lava tagata. 

Na malaga mai lona ‘āiga ‘i Niu Sila ‘ina ‘ua fa’ato’ā 10 tausaga ‘o Tiana.  Na ‘avea lona tua’ā le afioga ‘a A’e’au Semi Epati ma fa’amasino Pasefika muamua ‘i totonu ‘o Niu Sila.

‘O le 2019, na ‘avea ai Tiana Epati ma peresetene ‘o le Sosaiete ‘a Lōia ‘i Niu Sila, ma ‘avea ai ma ulua’i Pasefika muamua, ‘ae ‘o le tama’ita’i lōia lona fā fo’i lea ‘ua ‘ūmiaina lea tūlaga tofi ‘i le tala fa’asolopito ‘o le fa’alāpotopotoga lōia ‘a Niu Sila.

Link to RNZ Pacific (Article) translated: https://www.rnz.co.nz/international/pacific-news/575232/from-a-small-samoan-village-to-the-top-of-nz-law-tiana-epati-proves-it-s-possible

ATA: AE-tangata/Linkedin/Tiana Epati / Video: Murray Faivalu (SCR).