‘Ave le tagi ‘a le Iuni fa’asaga ‘i le Soifua Mālōlōina ‘a Niu Sila, taumafai ‘e tāofi ai le vāea ‘o gāluega

‘O ‘ananafi na tu’uina atu ai se tagi ‘a le fa’alāpotopotoga ‘o tagata faigāluega ‘a le Mālō, ‘i le Pūlega mō Matā’upu tau ‘i Gāluega, ‘e fa’asaga lea ‘i le Health NZ po’o le Soifua Mālōlōina ‘a Niu Sila, ‘e taumafai ‘e tāofi ai le gāioiga ‘o lo’o faia, ‘o le vāea lea ‘o tagata faigāluega, ‘o lo’o ‘i le fa’alāpotopotoga.  ‘E 25,000 le aofa’iga ‘o tagata faigāluega ‘i le Health NZ ‘e i totonu o le PSA.

Faitau afe gāluega ‘ua vāea ‘i le Health NZ, ‘e aofia ai le tele ‘o avanoa ‘ua fa’amālōlō pe ‘ua lē toe fa’atumuina fo’i.  ‘O lo’o fa’apitoa le tagi ‘ua fa’auluina, mō gāluega ‘e tusa ma le 1100 ‘i le itū tau ‘i le pūlega ‘o fa’amaumauga, lea ‘e fa’apea ‘e lata lava ‘ina ‘afa ai le nūmera ‘o le ‘aufaigāluega ‘i lea vāega ‘o le soifua mālōlōina, ‘ae lē gata ‘i lea, ‘o le vāea ‘o ni gāluega ‘i le National Public Health Service fa’apea ai ma le itū ‘o lo’o pūleaina ‘au’aunaga mō Pasefika. 

Na fa’aalia ‘e le PSA, na fa’anatinati le faiga ‘o lea fuafuaga, tele vāega ‘e lē sa’o, ma ‘ua solia ai fo’i māliliega tu’ufa’atasi ‘a tagata faigāluega fa’apea ai ma isi tūlāfono.

Link to RNZ (Article) translated by Savelina Kasiano: https://www.rnz.co.nz/news/national/541691/union-launches-legal-action-against-health-nz-to-try-to-halt-job-cuts

ATA: Unsplash / RNZ.