‘Aupito fa’alētonu Wainuiomata ‘i le suāvai

‘O Wainuiomata le pitonu’u ‘e aupito tele ai paipa pāpā ma mama ‘o lo’o liki ma alu le aoga ai le suāvai, ‘i totonu ‘o le itūmālō ‘ātoa ‘o Uēligitone.

‘O lea tūlaga na fa’ailoa mai ‘i fa’amaumauga āloa’ia ‘a le matāgāluega ‘e pūlea le suāvai  ‘o Uēligitone, le Wellington Water.

Na tāu’a ai ‘a fa’atusatusa ‘i fa’amaumauga mō isi pitonu’u ‘e aofia ai Lower Hutt, Upper Hutt, Porirua ma Uēligitone, ‘ona manino mai lea ‘o Wainuiomata lava ‘e aupito tele le aofa’i ‘o paipa ‘e mama ma pāpā ai, ma alu lē aogā ai le suāvai taumafa ‘āmata mai lava ‘i le tausaga ‘e 2020.

‘O le vā ‘o le māsina ‘o Iūlai 2020 ma Iuni ‘i le 2021, ‘e 593 le aofa’i ‘o paipa na pāpā ma liki ai ‘i Wainuiomata.

‘I Upper Hutt, ‘o le pitonu’u ‘o Trentham sā aupito tele ai paipa pāpā ‘a’o Uēligitone ‘o Karori.

‘E talitonu le pulenu’u ‘o Lower Hutt ‘iā Campbell Barry, ‘ātonu ‘o le tele ‘o Wainuiomata ‘e māfua ai ‘ona tele paipa ‘e liki ma mama ai nai lō isi pitonu’u ‘o Uēligitone

Na tā’ua fo’i ‘e le ali’i pulenu’u ‘ua tu’uina atu ‘e le pūlega ‘o Lower Hutt se vaegātupe fa’aopoopo ‘e $2.8-milona tālā ‘i le pūlega ‘o le suāvai, ‘e lagolago ai a lātou gāluega ‘i le togafitia ‘o paipa pāpā ma liki ai le suāvai.

ATA: RNZ.