Auau nai tupe ‘a tagata penisiona ‘e tau totogi ai a lātou paoa
‘Ua faia ‘e nisi tagata penisiona ni gāioiga tusa lava pē mālūlū, ‘ae ‘e tau sefe ai le paoa, talu ai le si’itia pea ‘o tau, ‘e iai le tapē ‘o le vaivevela ‘i nisi ‘o taimi ma āga’i loa ‘i moega pe ‘ā fa’asolo ‘ina pogisā, ‘e tau sefe ai le ‘eletise.
‘O fa’amaumauga ‘a le ‘Ōfisa ‘o Fuainūmera Fa’amaumauina ‘a Niu Sila, ‘o lo’o fa’ailoa ai, ‘e lata ‘i le 9 pasene na si’itia ai tau ‘o le ‘eletise talu mai le māsina ‘o Iuni ‘i le tausaga talu ai. ‘E 15.5 pasene na si’itia ai le penisini ‘i lea lava piliota. ‘O le tala ‘a le tinā penisione ‘iā Sally ‘i le Checkpoint, na taufa’asoasoa lava lana paoa ‘aemaise lava, ‘ina ‘ua si’itia mai le 30sene ‘i le $1.80 ‘i le aso le tau ‘o lana ‘eletise, po’o le fixed rate, ‘i le low user charge, lea ‘e fa’aaogā ‘e tagata lātou te fa’aaogāna le 8000 iunite ‘i le tausaga pe maualalo ifo fo’i, mā ‘o le tausaga talu ai, na fa’aaogā ai ‘e le tinā le tusa ma le 4000 ‘o iunite. ‘Ae ‘o le tausaga talu ai ‘e o’o mai ‘iā Mati ‘o lenei tausaga, na ia fa’aaogāina ai iunite ‘e 2700.
‘O le tala ‘a Sally, na ia fa’aaogāina le ‘upegatafa’ilagi ‘o le Powerswitch ‘e sui ai mai le Genesis āga’i ‘i le Frank Energy, ma mafai ai ‘ona fa’asaoina lana $360 ‘i le tausaga. Peita’i ‘o lea ‘ua fa’amāvae le Frank Energy, ‘o lona uiga ‘o le ‘ā ia toe totogi fo’i le silia ma le $360 fa’aopoopo ‘i le tau na ia totogiina ‘i le 12 māsina ‘ua tuana’i. Sā $85 lana pili ‘i le māsina, peita’i ‘o lana pili talu ai nei, ‘e $131.
Na tā’ua ‘e le pule sili ‘o le Age Concern Canterbury, Greta Bond, ‘o le tau mālūlū tele ‘o Kalaiesetete, ‘o le ‘ā tā’oto’oto ai lava nisi tagata mātutua ‘i mōega ‘e fa’atalitali se’i o’o ‘i le aoauli ‘ina ‘ia māfanafana. ‘E lē taitai ‘ona lava le tupe ‘e o’o atu ‘i le $700 ‘o le winter energy payment ‘a le mālō ‘i le lima māsina ‘e fa’afetauia le si’itia ‘o le tau ‘o le ‘eletise. ‘E iai nisi tagata ‘e 80 pasene ‘o la lātou supa, ‘e alu ‘i le totogiga ‘o fale ‘ae totoe ai le isi 20 pasene ‘e taufa’amāfanafana ai fale ma isi mea ‘e pei ‘o taumafa.
Link to RNZ (Article) translated: https://www.rnz.co.nz/news/business/565774/pensioners-pinching-pennies-to-pay-for-power
ATA: RNZ.