Ao ‘e le Baycorp tupe ‘o lo’o nofo ‘aitālafu ai tagata ‘i le ‘Ōfisa ‘o Lāfoga – IRD

‘E ono feso’ota’i atu le ‘au’aunaga ao aitālafu ‘a le Baycorp, ‘e tuliloa ma aoina ‘aitālafu mai tagata ‘o lo’o nofo ‘aitālafu ‘i le ‘ōfisa ‘o Lāfoga. ‘O lo’o fa’asalaina ‘e le ōfisa ‘o Lāfoga pisinisi ‘e le’i sa’o le fa’amauina ma le failaina ‘o ā latou lāfoga ‘i le tausaga fa’aletupe ‘ua tuana’i.

‘I le taimi muamua, na taʻua ai ‘e 200 tagata fai pisinisi ‘o lo’o mafai ona fa’aaogā ā lātou fale fa’atau ‘e totogi ai ‘aitālafu mō Lāfoga. ‘O lo’o mata’itūina fo’i le fegāsoloa’i ‘i le vā o tuā’oi, ‘i le to’atele ‘o tagata ‘o lo’o iai ‘aitālafu ‘o lo’o ‘i fafo ‘o Niu Sila, ‘aemaise ‘i tamaiti ā’oga ‘i student loans.

‘I le taimi nei, pei ona lipotia ‘e le Leitiō Niu Sila, ‘o le ‘ā fa’aaogā se pātī lona tolu, po’o le kamupanī nate aoina pē tusa ma le 3000 ‘o tagata ‘o lo’o iai ‘aitālafu ‘i le IRD ‘e i lalo ifo ‘o le $5000. Fa’aalia ‘e le so’o’upu ‘o le ‘ōfisa ‘o Lāfoga Jane Elley, ‘e fa’apea ‘e lē mafai ona fa’afeso’ota’i uma ‘e le ‘ofisa tagata ‘o lo’o iai ‘aitālafu, ma ‘e mo’omia lava le fesoasoani mai ‘i isi ‘au’aunaga.

‘Ua tele tausaga ‘o gālulue soso’o tau’au le IRD ma le Baycorp ‘e ao mai ‘aitālafu mai ‘i tamaiti ā’oga, ma ‘o le māfua’aga lea na ō lātou filifilia ai lea ‘au’aunaga ‘e fesoaosani ‘i le tau aoina ma tuliloa ‘aitālafu. Fa’ailoa ‘e Elley, ‘o le ‘ā fa’afeso’ota’i ‘e le Baycorp tagata ‘e ala ‘i ‘imeli, fe’au tusitusia ma le telefoni ‘e fa’amaonia ai le ‘aitālafu ma faia ni māliliega ‘e mafai ai ona toe togiotogi atu ‘aitālafu.

‘E iai le popōlega ‘o tagata ‘i le tele ‘o le ‘au taufa’asesē ‘e feso’ota’i atu ina nei gau ai tupe, peita’i na fa’amanino ‘e Elley, ‘e mafai ona viliina le IRD pe ‘ā masalomia ‘o se telefoni taufa’avalea, ‘e mafai ai ona fa’amaonia ‘o le ‘au’aunaga sa’o lea ‘e feso’ota’i atu. 

Link to RNZ (Article) translated: https://www.rnz.co.nz/news/business/557750/inland-revenue-calls-in-debt-collector-baycorp-in-crackdown

ATA: RNZ.