‘Āmata va’aia ‘i Niu Sila a’afiaga ‘o le taua ‘i Sasa’e Tūtotonu

‘Ua ‘āmata ‘ona fa’alogoina ‘e kamupanī ‘e a’afia ‘i le ātina’ega ‘o tūrisi ‘i totonu ‘o Niu Sila, ‘ia a’afiaga ma fa’alētonu ‘e māfua mai ‘i le taua ‘i Sasa’e Tūtotonu ‘o ia a’afiaga ‘e aofia ai le si’itia lea ’o le tau ‘e fa’agāioi ai pisinisi ma ‘au’aunaga mō tūrisi ma tagata maimoa mai fafo.

‘O le 18 māsina ‘ua mavae atu nei, sā māitauina ai le ‘āmata ‘ona toe fo’i ‘o lea ātīna’e tele ‘a Niu Sila, ‘i se tūlaga feololo, ‘ae peita’i, ‘o le fa’alētonu ma le taugatā ‘ua iai nei suāu’u ma penisini ‘i le lalolagi, ‘ua faigatā ai ‘ona toe fo’i le ātina’e ‘o tūrisi ‘i se tūlaga lelei ‘āto’atoa ‘e tatau ‘ona iai.

Na fa’ailoa mai ‘e le Fa’atonu ‘o le Fa’alāpotopotoga mō le Ātīna’e ‘o Tūrisi ‘a Niu Sila, ‘o Rebecca Ingram, ‘o fa’alētonu ‘ua aliali mai ‘i lenei vāitaimi, ‘e lē gata ‘ina si’itia le tau ‘o le soifuaga, ‘ae ‘ua fa’apēnā fo’i ‘ona si’itia ai ma le tau ‘e femālāga’i ai tagata ‘aemaise ‘o tūrisi ma tagata tāfafao mai fafo.

Na tā’ua ‘e le tama’ita’i fa’atonu, ‘e tele pisinisi ‘ua feagai nei ma le si’itia ‘o le tau ‘e fa’atino ai a lātou ‘au’aunaga, ‘ona ‘o le taugatā ‘ua o’o ‘i ai le tau ‘o le suāu’u ma le penisini.

Sā fa’aalia mai fo’i ‘e fa’apea, ‘ātonu ‘o se fa’amanuiaga le tūla’i mai ‘o nei fa’alētonu ma le ‘uma ‘o le vāitau ‘o le taumāfanafana po’o le summer ‘o le vāitau ‘e aupito pisi ai gāluega ma ‘au’aunaga mō tūrisi.

Link to RNZ (Article) translated: https://www.rnz.co.nz/news/business/591019/tourism-industry-leader-says-businesses-are-experiencing-sharp-increase-in-business-costs

ATA: Quin Tauetau / RNZ