‘Āmata nei ‘ona talia ‘e le Kiwi Rail le fa’amāvae ‘i le loto fuatiaifo ‘o lana ‘aufaigāluega

‘O le asō ‘ua ‘āmata ai ‘ona talia ‘e le kamupanī ‘o le Kiwi Rail lana ofo ‘ua ‘uma ‘ona tu’uina atu ‘i lana ‘aufaigāluega, ‘e fia fa’amāvae mai o lātou tofiga, ‘i le loto fuatiaifo ‘o le tagata lava ia, po’o le faiga fo’i lenei ‘e tā’ua ‘i le gagana Peretānia, ‘o le voluntary redundancy, lea ‘e maua uma ai aso mālōlō ma aso ma’i ‘o le tagata ‘e fua ‘i le ‘umi ‘o lana tautua.‘O le vāiaso na te’a nei, na fa’ailoa atu ai lea fuafuaga ‘a le Kiwi Rail ‘i lana ‘aufaigāluega, mā na fa’ailoa mai ai ‘e le Ali’i ‘Ōfisa ‘o Feso’ota’iga ‘o Andrew Norton, ‘o lenei gāioiga ‘a le kamupanī, ‘o lo’o fa’amoemoe ‘e toe fa’atūlagaina ai la lātou pisinisi, ma fa’aitīitia tupe alu ‘i le fa’atinoina ‘o gāluega fai ‘ina ‘ia fa’aleleia ai le āga’i ‘i luma.

Sā ofoina atu muamua lenei fuafuaga ‘i nisi ‘o vāega ‘o le kamupanī, ‘ae peita’i la, ‘o le ‘ofa lea ‘ua iai nei, ‘ua aofia ‘uma ai le ‘aufaigāluega ‘ātoa ‘a le Kiwi Rail ‘e ‘āmata ‘ona fa’amamalu atu ‘i le asō.‘E lua vāiaso lea ‘ua tu’uina atu ‘i le ‘aufaigāluega ‘e talosaga ai mō lea tūlaga, ‘i lātou ‘ua mānana’o ai, mā ‘o lo’o fa’amoemoe ‘e tatau ‘ona maua ‘i ai se fa’ai’uga mautū ‘a le pūlega ‘i le aso 11 ‘o Nōvema ‘i talosaga ‘uma ‘o le ‘ā talia.

‘Ua fa’ailoa mai ‘e le pule sili ‘o le Kiwi Rail, ‘o Peter Reidy, ‘o le fuafuaga ‘e fa’amālōlō ai nisi ‘o le ‘aufaigāluega, ‘e lē ‘o se mea faigōfie, peita’i, ‘ua o’o ‘i le taimi talafeagai ‘e tatau ai ‘ona faia se suiga ‘i le fa’agāioiga ‘o le ‘au’aunaga ‘a le kamupanī.

 Link to RNZ (Article) translated by Lauano Ilaoa: https://www.rnz.co.nz/news/business/531206/you-re-being-offered-voluntary-redundancy-what-s-next

ATA:  KiwiRail