‘Āmata le fa’amasinoga ‘o le ali’i faife’au ‘o Brian Tamaki

Na ‘āmata ‘i le Aso Gafua ‘i le Fa’amasinoga Fa’a-itūmālō ‘i ‘Aukilani, le fa’amasinoga ‘o le ali’i faife’au ‘o’le Destiny Church, ‘o Brian Tamaki, lea ‘o lo’o feagai ma moliaga ‘i le solia ‘o sā ma tapu ‘o’le fa’ama’i koviti-19 ‘i le māsina ‘o ‘Oketopa fa’apea ai ma Nōvema ‘o le tausaga ‘e 2021.

‘O lo’o mōlia ai fa’atasi le ali’i faife’au ma lona faletua ‘o Hannah Tamaki, fa’apea ma nisi tagata se to’alua, ‘e māfua mai ‘i ni solo tete’e sā ‘āuai ‘i le vaitaimi ‘o lo’o tūlaga 3 ia sā ma puipuiga ‘o le kōviti-19.  ‘E lē gata ‘i lea, ‘ae ‘o lo’o mōlia fo’i Brian Tamaki ma lona to’alua fa’apea le isi tama’ita’i ‘e igoa ‘iā Jennifer Marshall, ‘i lo lātou fuafuaina lea ‘o se fa’atasiga ‘o tagata ‘e to’atele ‘i le taimi ‘o tapu ma sā ‘o le fa’ama’i.

‘O solo tete’e, ‘e pei ‘ona mōlia ai ‘i lātou nei, sā faia ‘i le taimi ‘o lo’o tapula’a ai ‘i le nā ‘o le to’a sefulu le aofa’i ‘o ni tagata ‘e mafai ‘ona ‘āuai ‘i se fa’aipoipoga ‘e faia ‘i fafo, fa’apea le falelauasiga ‘o ni maliu, a’o ni fa’atasiga ‘e to’atele atu tagata ‘e mana’omia ‘ona iai, sā fa’asāina ai ‘i lea taimi ‘o le vevela ‘o le fa’amai.  Peit’ai, ‘ua māfua ‘ona mōlia le ali’i faife’au ‘o Brian Tamnaki ma ‘i lātou ‘uma nei, ‘ona ‘e fa’apea ‘e to’atele atu tagata sā ‘āuai ‘i ni fa’atasiga sa o lātou fa’atūlagaina.  ‘O lo’o fa’atūlagaina lenei matā’upu mō le vāiaso ‘ātoa lenei ‘i le Fa’amasinoga fa’aitūmalō ‘i ‘Aukilani.

 Link to RNZ (article) translated by Savelina Kasiano:https:https://www.rnz.co.nz/news/national/532749/brian-tamaki-faces-trial-over-alleged-covid-19-rule-breaches

Ata: RNZ / Marika Khabazi