‘Āmata ananafi (Aso Lua) tui maua ‘o le fulū mō tamaiti ‘i lalo ‘o le 5 tausaga

‘O le Aso Lua, ‘o ananafi lea, na ‘āmata tatala ai le faiga ‘o tui puipui ‘o tamaiti ‘i lalo ‘o le ta’i 5 tausaga le mātutua, ‘a’o feagai ai le soifua mālōlōina ‘a le atunu’u ma taimi pito sili ‘ona tetele ai le fa’ama’i ‘o le fulū pe ‘ā fua ‘i nai tausaga ‘ua tuana’i atu.

Na fa’asilasila ‘e le Minisitā Lagolago ‘o le Soifua Mālōloina David Seymour fa’atasi ma le Minisitā o le Soifua Mālōloina Simeon Brown ia suiga ‘i aiāiga ‘o tui ‘o le fulū ‘i le aso ananafi ‘i Aukilani.  Na o lā fa’aalia ‘e fa’apea, ‘o le fa’ai’uga ‘a le Pharmac ‘e toe fa’alautele atu ai le tui puipui ‘o le fulū ‘e lē totōgia mō tamaiti ‘i le vā ‘o le ta’i 6 māsina ma le ta’i lima tausaga le mātutua, lea ‘ua suia ‘e ‘āmata mai le Aso Lua, ‘o ananafi lea, ‘ae lē ‘o le tausaga ‘e 2027 pei ‘ona fa’asilasilaina ‘i le vaiaso talu ai. 

‘O le māfua’aga fo’i ‘o lea fa’ai’uga, ‘e tali atu ai ‘i le mana’oga ‘o tagata gasegase ‘o lo’o talosaga mō le tui puipui ‘ina ‘ia vave maua.  Mā ‘e silia ma le 260,000 tamaiti lāiti ‘ua agava’a nei ‘i le tui puipui maua fua ‘o le fulū.

Na tā’ua ‘e le fa’atonu sili ‘o le Pharmac, Geraldine MacGibbon ‘i le Leitiō Niu Sila, ‘ua fa’amaonia ‘o le ‘ā tūmau lava lea suiga. 

Link to RNZ (Article): https://www.rnz.co.nz/news/political/1208365/free-flu-vaccines-for-under-5s-made-available-from-today

IMAGE/ATA: Samuel Rillstone / RNZ