‘Āmata āloa’ia fa’atōsina ‘o le pālota ia Nōvema

‘O le Aso Sā ananafi, lea na tatala ai āloa’ia ‘i ‘Aukilani, fa’atōsina ‘a patī ‘autū ‘e lua ‘a Niu Sila, ‘o le National ma le Labour, mō le pālota tele ‘e pei ‘ona ‘atofaina mo le aso 7 ‘o Nōvema.

Sa muamua ‘i le ‘afa ‘o le tasi (1.30pm), ‘i le aoāuli, le saunoaga ‘a le ali’i palemia ia Tuisinavemaulumoto’otua Christopher Luxon, le ta’ita’i ‘o le National, ‘a’o le saunoaga ‘a le ta’ita’i ‘o le Labour ia Chris Hipkins, ‘o le 20 minute ‘e te’a ai le itulā ‘e 3.00 ‘i le afiafi ‘o le Aso Sā.

Sa folasia ai ‘e le ali’i palemia, ia nisi ‘o mea sa mafai ‘ona fa’atino ‘e le faigāmālō so’ofa’atasi ‘i le tolu tausaga lea ‘ua fa’ai’ui’uina nei ma fa’ailoa mai nisi ‘o fuafuaga ma faiga fa’avae ‘e manatu le National, ‘e manuia ai le atunu’u ‘i le lumana’i.

‘Ae ‘o le saunoaga ‘a le ta’ita’i ‘o le Labour ia Hipkins, na ia tā’ua ai, ‘o le mafua’aga ‘o le mau fa’afītāuli ‘ua pagātia ai nei le atunu’u, ‘ona ‘o le fa’alētonu ‘o le ta’ita’iga ‘a Luxon ma le pātī ‘o le National, o le ta’ita’i ‘o le faigāmālō so’ofa’atasi, pei ‘ona gālulue ai ma le ACT fa’apea le pātī ‘a le NZ First.

‘E ui ‘ina ‘ua tele le mau fa’alauiloa ma fa’asalalauga fa’alaua’itele ‘a pātī ‘uma ‘e tusa ‘o le finauina ‘o le pālota ia Nōvema, ‘ae ‘o lea faato’a tatala lelei ia polokalame ‘o fa’atōsina ‘a pātī nei ‘o le National  ma le Labour ‘i le Aso Sā ma ‘ua āloa’ia ai le vaitaimi ‘o fa’atōsina mo le pālota tele ‘o lo’o loma nei.

‘Ua soso’o lea tulaga ma le tauāofiaga fa’ai’u ‘a le Palemene ‘i le Aso Lulu na te’a nei lea ‘ua avanoa ai nei faipule ‘uma ‘e fo’i atu ‘i ō latou itūmālō mō le fa’afoeina ‘o ā latou fa’atōsina mo le palota ‘i le aso 7 ‘o Nōvema.

Link to RNZ (Article): https://www.rnz.co.nz/news/politics_election-2026/1603176/as-it-happened-election-campaign-27-september

IMAGE/ATA: Christopher Luxon and Chris Hipkins at their respective election campaign launches in Auckland.Photo credit:RNZ/NZME