Āfāina polokalame ‘e fa’atūmau ai le soifua mālōlōina ‘o tagata Niu Sila ‘ona ‘o le vāea ‘o tagata faigāluega – PSA

‘O le ‘ā āfāina le soifua ‘o tagata Niu Sila ‘ona ‘o fuafuaga ‘a le Mālō ‘e fa’amuta ai le lata ‘i le 1500 ‘o gāluega ‘i le Te Whatu Ora pei ‘ona fa’aalia ‘e le PSA po’o le fa’alāpotopotoga ‘o tagata faigāluega ‘a le Mālō.  Ma ‘ua faia fo’i lenei fa’ai’uga ‘i se taimi ‘o lo’o matuā feagai ai le Soifua Mālōlōina ma faigatā.  ‘O le fa’asilasilaga lea na fa’ailoa mulimuli lata mai ‘i le ‘aufaigāluega ‘i le aso ananafi, ‘ua a’afia ai le itū ‘o gāluega ‘i le Data and Digital group, ‘o i lātou ia ‘o lo’o feagai ma le va’aiga ‘o polokalame tau ‘i masini ma fa’atēkonolosi ‘ua tuai, fa’apea ai ma le ‘au’aunaga ‘o le Soifua Mālōlōina lautele ‘a le atunu’u ‘o lo’o fa’alauiloaina tui puipui, ‘o le itū ‘i tāpenaga mō fa’alavelave fa’afuase’i ‘i le soifua mālōlōina ma ‘au’aunaga ‘e fa’amuta ai le ulaula tapa’a. 

‘O se tasi lenei ‘o gāioiga ‘ua osofa’i ai ‘au’aunaga ‘o le soifua mālōlōina ‘o lea ‘o lo’o feagai ma le tele ‘o fa’alētonu mā ‘o le ‘ā ātili āfāina ai le ola mālōlōina ‘o tagata ‘uma ‘o Niu Sila pei ‘ona fa’aalia ‘e se tasi ‘o le pūlega ‘o le PSA.

‘Na fa’aalia ‘e le ‘Asosi ‘o tagata faigāluega ‘a le Mālō, ‘e 1120 gāluega ‘o le ‘ā vāea mai le Data and digital team ‘a le Te Whatu Ora po’o le 47pasene ‘o le ‘aufaigāluega ma le 358 mai le gāluega ‘i le Public Health Sevice po’o le 24 pasene.  Peita’i ‘o le tala ‘a le Soifua Mālōlōina, ‘o le aofa’iga ‘o gāluega ‘o le ‘ā fa’amuta mai le ‘au’aunaga lautele ‘o le Soifua Mālōlōina, le National Public Health Service, pe nā’o le 57 pe ‘ā ‘ave’ese gāluega ‘e le’o iai nisi ‘o fa’atumuina.  Peita’i na fa’ailoa ‘e le PSA, ‘o a lātou fuainūmera, ‘o lo’o aofia ai ma le tusa ma le 300 ‘o avanoa ‘e le’i iai nisi na fa’atinoina ‘ae sā i totonu ‘o le pāketi peita’i, sa fautuaina ‘e fa’amuta.  ‘O le aso tonu na fa’asilasila ai le pepesi ‘o le tale vivini, na fa’ailoa ai ‘i lea ‘au’aunaga ‘o le Soifua Mālōlōina le tūlaga ‘i gāluega ‘o le ‘ā āfāina.

ATA: PSA