Āfaina nisi ‘o malaga ‘i le malae va’alele ‘o Ueligitone

‘E iai malaga sā le’i mafai ‘ona tūlau’ele’ele ‘i le malae va’alele ‘i Ueligitone ‘i le afiafi ‘o le Aso Sā ‘ananafi ‘ona ‘o se fa’alavelave na a’afia ai se va’alele. ‘O lea fa’alavelave na lipotia mai po’o le itula ‘e 4 i le afiafi ‘ina ‘ua tūlau’ele’ele ifo se va’alele ma iloa ai le asu ‘ona ‘o se mū sā a’afia ai se tasi ‘o ona afi.

‘O ata video ‘ua fa’asalalauina ‘e nisi ‘i luga ‘o ‘upega ‘o feso’ota’iga televavave, ‘o lo’o manino ai le matuā mālosi ‘o le asu mai le afi na a’afia ‘o lenei va’alele.

Peita’i sā mafai ‘ona tūlau’ele’ele saogālemū, ‘e aunoa ma se tasi ‘o le pāsese ‘e 40 na Āfaina.

Na fa’ailoa mai ‘e le Pūle ‘o Faigāmalaga ‘a le kamupani va’alele a le Air New Zealand, ‘o Hugh Pearce, ‘o le va’alele lenei sā ‘i lana malaga numera 5366 mai Kalaiesetete āga’i mai ‘i le laumua ‘i Ueligitone.

Ma sā vave ‘ona iai le tineimū ma vāega mo galuega fesoasoani ‘i taimi ‘o fa’alavelave fa’afuase’i, mā ‘e ui ‘ina sa le’i mafai ‘ona faia nisi malaga fa’atūlagaina, ‘ae sā mafai lava ‘ona toe fa’aauauina ‘au’aunaga māsani ‘i le malae va’alele ‘i Ueligitone ‘i le afiafi ‘ananafi.

ATA: NZ Herald (Sourced).