Āfāina le ‘au’aunaga mō tagata ‘ona ‘o le mana’o le mālō ‘e fa’aitiitia tupe alu

‘O le aofa’iga ‘o tupe ‘ua alu ‘a le Mālō, ‘e totogi ai tagata faigāluega ia ‘ua fa’amālōlō mai a lātou gāluega, ‘ua saga fa’amautūina ai le tūlaga āfāina ‘o le to’atele ‘o tagata, ‘o le atunu’u, ‘i lea fuafuaga ‘a le faigāmālō so’ofa’atasi, ‘o le manatu lea ‘o le Pātī ‘a le Labour.

‘Ua iloa ‘i le tali tusitusia mai le Minisitā ‘o le Soifua Mālōlōina ‘ua iai nei, ‘o Simeon Brown, ‘i se fesili fa’a-Palemene sā tu’uina atu ‘i ai ‘a le Labour, ‘e $33-miliona Tālā le aofa’iga ‘o tupe ‘ua totogi atu ‘e le matāgāluega ‘i tagata faigāluega ia ‘ua vā’ea ma fa’amālōlō mai le vāega ‘o le Health New Zealand, ‘ae ‘ese ai le isi $4-miliona tālā mō totogi ‘o isi tagata ‘ua tutuli mai a lātou gāluega ‘i le Matāgāluega ‘o le Soifua Mālōlōina le Health Ministry ‘i le vā ‘o le Aso 23 ‘o Nōvema ‘i le taimi na tūla’i mai ai le faigāmālō so’ofa’atasi lea ‘o lo’o iai nei, ma le  aso 7 ‘o Fepuari na se’i mavae atu nei.

Sā fa’ailoa mai ‘e le sui so’o’upu ‘o le Labour mō matā’upu tau ‘i le Soifua Mālōlōina, ‘o Ayesh Verral, ‘ua na’o se vāega lea ‘ua fa’atino ‘o fuafuaga nei ‘a le faigāmālō ‘i totonu ‘o le Matāgāluega ‘o le Soifua Mālōlōina, mā ‘e maoa’e vaegātupe ‘e a’afia ai fa’atusa ‘i isi vāega ‘o le ‘aufaigāluega ‘a le Mālō.

‘O le tāofi ‘o le Pātī ‘a le Labour ‘o le $33-miliona ‘o se tupe tele sā tatau ‘ona fa’aaogāina mō nisi ‘au’aunaga mana’omia fa’alesoifua mālōlōina.  Sā fa’ailoa mai fo’i ‘e le tama’ita’i faipule ‘o Ayesha Verral, se līpoti ‘a le Sōsaiete ‘o le PSA, lea na atagia ai ‘o le 86 pasene ‘o tagata faigāluega ‘a le matāgāluega ‘o le soifua mālōlōina, ‘e manatu ‘o le fa’aitīitia ‘o vaegātupe ‘i gāluega fai ‘a lenei matāgāluega tele ‘a le Mālō, ‘o le ‘ā ātili ai ‘ona faigatā ‘ona maua ‘e se vāega tele ‘o le atunu’u ia ‘au’aunaga talafeagai tau ‘i le soifua mālōlōina.

Link to RNZ (Article) translated: https://www.rnz.co.nz/news/national/543517/most-health-care-workers-think-cuts-are-damaging-services-survey

ATA: RNZ / Samuel Rillstone