Āfāina felafolafoa’iga ‘i le Palemene ‘ona ‘o le tele nauā ‘o tūlāfono fou

‘O le tele nauā ‘o tālāfono fou ‘o lo’o mana’o le mālō ‘e pāsia, ‘ua āfāina ai le tūlaga ‘o felafolafoa’iga ‘i totonu ‘o le Palemene, ma tele ‘ina fono fa’alausoso’o ai le maota, ‘i tūlaga fa’anatinati ma le fa’aopoopoina ‘o ītūlāa fono ‘i le pō fa’apea ma le fa’ai’uga ‘o le vāiaso.

‘E lē gata ‘i lea, ‘ae ‘ua iloga fo’i ‘ona fa’aitīitia ai ma le lava ‘o le taimi ‘o komiti filifilia ‘o le Palemene, ‘e fa’atino ai a lātou gāluega māsani ‘i le lauliliuina ma le iloiloina ‘o tūlāfono ta’itasi.

‘O le taimi nei, ‘e tusa ‘o le līpoti mai le Palemene ‘i Uēligitone, ‘e 261 le aofa’i ‘o ni pili ‘o lo’o mana’omia ‘ona faitauina ‘i le faitauga muamua, ‘a’o le’i o’o ‘i le vāiaso mulimuli ‘o tauaofiaga ‘a le maota.

‘Ā fa’atusa lea aofa’iga ‘i isi palemene ‘e fa talu ai nei, ‘ona manino ai lea ‘o le maoa’e ‘o tūlāfono nei pei ‘ona mana’o le faigāmālō ‘o lo’o tū nei ‘i le foe ‘e pāsia.

‘O le Palemene lona 49 ‘i le tausaga ‘e 2008 ‘e 213 le aofa’i ‘o ā lātou pili po’o tūlāfono taufa’aofi sā tu’uina atu ‘i le maota, ‘ae ‘o le paea’iga lona 50 ‘i le tausaga ‘e 2011 ‘e 174 a lātou tūlāfono na talanoaina ma pāsia ai, soso’o mai ai le paea’iga lona 51 ‘i le tausaga ‘e 2014, ‘e 182 a lātou tūlāfono na pāsia ai, ‘a’o le paea’iga lona 52 ‘i le 2017, ‘e 224 le aofa’i ‘o pili ‘a le mālō na talanoaina ma pāsia ai, ma le paea’iga lona 53 ‘i le tausaga ‘e 2020, ‘e 220 pili ma tūlāfono na pāsia ai ‘e le Palemene, ‘a’o lenei paea’iga ‘ua tau fa’ai’ui’u, ‘e pei ‘ona tā’ua muamua ‘e 261 le aofa’i ‘o pili ma tūlāfono fou ‘a le mālō, lea ‘o lo’o taumafai nei ‘e ūna’i ma pāsia ‘a’o le’i ‘uma le taimi ‘o le nofoa’iga.

‘Ua fa’amauina fo’i ‘i le taimi nei, ‘e fa’apea, ‘o le Palemene lona 54 lenei ‘o Niu Sila, ‘e 38 le aofa’i ‘o pili po’o tūlāfono taufa’aofi, ‘e le’i faia ni faitauga muamua ‘i le māota, ‘ona sā fa’ananati ‘ona talanoaina ma pāsia, ‘o se aofa’iga aupito maoa’e lea ‘i le talafa’asolopito ‘o faigāmālō ‘a Niu Sila.

Link to RNZ (Article): https://www.rnz.co.nz/news/politics/1479683/pity-the-committee-48-meeting-days-55-laws

IMAGE/ATA: SCR (file).