95 pāsene ‘o le penisione ‘e alu ‘i le totogi ‘o le fale

‘E iai tagata mātutua ‘o Niu Sila, ‘e o’o ‘i le 95 pāsene ‘o le lātou penisione ‘o lo’o alu ‘i le totogi ‘o fale po’o le rent ‘o mea ‘o lo’o nonofo ai ‘i le taimi nei. ‘Ua atagia lea tūlaga ‘i le Checkpoint ‘a le Leitiō Niu Sila, ‘o lo’o fa’atalanoaina ai nisi ‘o le ‘au mātutua, ‘i le fa’amālosia ‘o ‘i lātou ‘e totogi ni rent taugatā ‘atoa ai ma le tau leai ‘o ni fale talafeagai ‘e maua ‘e nonofo ai tagata ‘ua penisione.

‘O lenei fa’afitauli, ‘e manatu le Komisi mō Tagata ‘ua Mālōlō Litaea, le Retirement Commission, ‘o le ‘a aga’i ‘ina fa’atetele ‘ona ‘o le ‘a agai ‘ina fa’aluaina le aofa’i ‘o tagata ‘e sili atu ‘i le 65 tausaga ‘ole soifua ‘e mautotogi ‘i fale ‘o isi, ‘i le tausaga ‘e 2048 ma o’o ai lea aofaiga ‘i le 600,000.

‘O lo’o tā’ua ‘i le polokalame ‘a le Checkpoint, se tasi ‘o tagata matua penisione ‘e nofo ‘i Whanganui, ‘e $450 le rent ‘i le vaiaso mō lona fale ‘e lua potumoe, ‘ona totoe ai lea na ‘o le $70 talā mai lana penisione ‘e ola ai, ma ‘o lo’o galue part-time ‘e tau fa’afetaui ai mana’oga māsani ‘o le soifuaga.

Link to RNZ (Article) translated by Lauano Ati Ilaoa: https://www.rnz.co.nz/news/national/526857/crunching-the-numbers-over-65s-spending-almost-all-of-pension-on-sky-high-rent

ATA: Sāmoa Capital Radio (file).