900 aso ta loka ta’ito’atasi ai pagotā e tusa ai ma se līpoti

‘E silia ma le 900 aso na nonofo ai ni pagotā ta’ito’atasi na’o ‘i lātou ‘i le falepuipui fa’apitoa mō ē ogaoga ni tūlaga lamatia ‘e ono tutupu mai ai.  Ma ‘ua solia ai aiāiga fa’avāomālō ‘o aiā tatau, ‘ia lē silia ma le 15 aso. 

‘O le taimi muamua lea ‘ua su’esu’eina ai ‘e le Office of the Inspectorate, lea falepuipui, ma sā fa’atūina ‘i le 2019, ‘ina ‘ua tupu le osofa’iga fa’atelolisi ‘i Kalaiesetete.  ‘O le fale fa’apitoa, lea ‘e fa’aigoaina ‘o le PERU ‘i le Falepuipui ‘i ‘Aukilani, ‘e nonofo ai pagotā ‘e iai le talitonuga ‘o le Matāgāluega ‘o Falepuipui, ‘e fa’aauau pea ‘ona maualuga le tūlaga lamatia ‘o le ono toe tutupu mai ai ‘o ni vevesi tele, mā ‘e aofia ai fo’i ma nisi ‘e ‘āuai ‘i solitūlāfono ‘e taupulepule fa’atasi. 

‘E to’a 13 pagotā sa va’ava’aia ‘i totonu ‘o lea fale.  Sa māua ‘i le su’esu’ega, sa ‘ova le mamafa ‘o tu’utu’uga mō ē na taofia ai.  ‘E to’a 13 taulele’a ‘e 632 aso na taofia ai ‘i lea fale.  ‘E to’alima na iai mō le silia ma le 900 aso ma le to’alua ‘e silia ma le 800 aso.  ‘E le’o pagotā ‘uma fo’i ia, na fa’asalaina ‘ona ‘o ni solitūlāfono ogaoga, ‘o nisi ‘o lo’o fa’atalitali ai aso ‘o fa’amasinoga.  Sā māua fo’i, ‘e to’atele pagotā sa le’i iloa po’o ā ni mea lātou te mafai ‘ona faia, ‘e mafai ai ‘ona tu’ua le PERU ‘ae āga’i ‘i se isi va’ava’aiga ‘e lē mamafa tele tu’utu’uga.  ‘E lēai ni fautuaga na folasia ‘e le līpoti peita’i sa aofia ai ni fa’ai’uga se 12 na maua mai le su’esu’ega, sa aofia ai le soifua mālōlōina lelei ma le ola laulelei.  Sa fa’aalia ‘e Falepuipui, ‘o le fa’ai’uga ‘ua maua lea su’esu’ega, ‘o le ‘ā fa’amautinoa ai, le fa’aauau pea ‘o galuega fa’aleleia ‘i lea falepuipui.

Link to RNZ (Article) translated by Savelina Kasiano: https://www.rnz.co.nz/news/national/526271/prisoners-held-in-solitary-confinement-for-900-days-report-finds

ATA: Sāmoa Capital Radio (file).