83 tausaga lē ‘avea ‘e le ‘avepasi ‘a le Intercity

‘O lo’o tatālia pea ‘e se tasi ‘o le ‘āiga ‘o  Bex Gardiner se tali atu ‘a le kamupani pasi ‘a le InterCity ‘e fa’atatau ‘i lana fa’aseā ‘i le gaioiga ‘a le ‘avepasi lea na tia’ia pe lē pikiina le tua’ā ‘o lona to’alua ‘i Kaikoura.

‘E mātuā ofo e ‘āiga ‘o le tamā 83 tausaga le matua, ‘ona ‘o le mafai ‘ona faia ‘e le ‘avepasi ‘o leaga gaioiga.  ‘O Gardiner na malaga mai Kalaiesetete aga’i i Nelesoni ‘ae na tū le pasi ‘i Kaikoura mō se mālōlōga.  Ma sa āga’i Gardiner ‘e fa’atau sana mea tausami, peita’i na to’atāma’i le ‘avepasi ‘ona ‘o le umi ‘o tau savali, ma ia tu’u ai le toea’ina ma lana ‘atopa’u ‘i Kaikoura.  ‘O ni tagata faigāluega o se fale’oloa lata ane na fesoasoani ‘i le tamā ma momoli ‘i lona ‘āiga. 

Na tā’ua ‘e le to’alua ‘o le atali’i ‘o Gardiner, ‘e lē mana’o ‘e tuli le ‘avepasi ma lana galuega ‘ae ‘ia iloa ‘ona fa’aaloalo ‘i tagata aemaise ‘o ē mātutua.  ‘I se pepa ‘o fa’amatalaga ‘a le Intercity na tu’uina atu ‘i le Leitio Niu Sila, sa ta’ua ai le popole ‘o le kamupani ‘i le matā’utu na tūla’i mai, ma sa fa’atoese ai ‘ia Gardiner.  Ua māe’a ona latou talanoa iai e siaki po’ō ā mai ma ofo atu fo’i iai e toe fa’afo’i atu lana tupe o lona pasese.  ‘O lo’o talanoa le Intercity i a latou tagata faigaluega ‘ina ia iai nisi fesoasoani e tuuina atu ma faamautino e faaauau le tulaga lelei o la latou auaunaga i le lumanai.

Link to 1News (Article) translated by Savelina Kasiano: https://www.1news.co.nz/2024/08/20/its-just-wrong-intercity-left-83-year-old-behind-in-kaikoura/

ATA: 1News.