$75,000 taui ‘o ni tagata faigāluega ‘e to’alua ‘ona ‘ua soli ‘e le kamupanī māta’aga matagofie fa’a-Pasefika

‘Ua fa’atonuina le The Pacific Island Business Development Trust ‘e totogi le $30,000 ‘iā John Faitala ‘o ‘Aukilani, ma le $45,000 ‘iā Vahanoa Vea ‘o ni taui ‘o a’afiaga ‘o o lā’ua lagona ma le fa’alumaina ‘o ‘i lāua ‘ina ‘ua vāea mai le fa’alāpotopotoga. 

Na fa’aalia ‘e Faitala na fa’afuase’i lava ‘ona lē toe maua lana gāluega, ma na manatu le to’atele ‘o tagata, ‘e iai se mea sesē na ia faia, ‘ua ala ai ‘ona mālōlō, ma fa’amāasiasiina ai ‘o ia. 

Na maua fo’i ‘e Faitala ona totogi ‘o māsina ‘e ono na lē toe maua, ‘a’o Vea ‘e 12 māsina.  ‘O la lā faitioga, ‘e fa’apea ‘ua mamā, ‘ina ‘ua tu’u atu a lā tusi ‘e ala atu ‘i le ‘īmeli ‘e fa’amuta ai a lā gāluega, ma ‘e le’o le ‘auala lea ‘e fa’atino ai ni matā’upu fa’apea, ma ‘e tatau lava ‘ona fesāga’i ma talanoa. 

Na folasia la lā matā’upu ‘i luma ‘o le Fa’amasinoga ‘o Gāluega ‘i ‘Aukilani, ma na saunoa le tama’ita’i fa’amasino, Merepaia King, ‘o le lape ‘o le fa’alāpotopotoga, ‘o le lē fa’atinoina ‘o lo lātou tiute, ‘o le mulimuli ‘i māta’aga matagōfie (values) Pasefika, lea ‘o lo’o manino lava, le iai ‘i totonu ‘o māliliega tusitusia mō gāluega ‘a tagata faigāluega.

‘O ia māta’aga matagōfie fa’aletagata (values), ia na talia mulimuli ane ‘e le fa’alāpotopotoga ‘e fa’apea, ‘o poutū ia ‘e lima ‘o le mafutaga ‘o tagata Pasefika – ‘o le fa’aaloalo, ‘āiga, mafutaga, fetausia’i fa’apea ai ma le lotu.  Na saunoa Galuvao Paul Pa’u lea na tū mō Faitala ma Vea, ‘o le vāega pito sili ‘ona tāua mai le matā’upu lenei, ‘o le fa’ai’uga lea ‘ua faia, ma ‘o le ‘ā ‘avea nei māta’aga matagōfie fa’aletagata Pasefika (values), ma vāega ‘o tu’utu’uga ‘o gāluega.

Link to NZHerald (Article): https://www.nzherald.co.nz/talanoa/two-workers-awarded-75k-compensation-after-court-finds-employer-breached-pasifika-values-including-respect/QQULIDIZT5DKTBFDA7VFA4VGTA/?shem=dsdf,sharefoc,agadiscoversdl,,sh/x/discover/m1/4

ATA: NZHerald.