51 gāluega ‘o le ‘ā soloia ‘i le Te Arawhiti – ‘ōfisa mō le vāfealoa’i ma Māori

‘E 51 le aofa’iga ‘o tūlaga tofi ma gāluega, ‘ua fa’amaonia mai, ‘o le ‘ā soloia ma lē toe fa’aauauina ‘i totonu ‘o le ‘Ōfisa lea ‘e fa’aigoaina, ‘o le Te Arawhiti, ‘e fa’apitoa ‘i le Vāfealoa’i ‘o le Mālō ma Tagata Māori, po’o le Office for Maori Crown Relations.  ‘O le Aso Faraile na te’a nei, na fa’ailoa ane ai ‘i le ‘aufaigāluega ‘o lea ‘Ōfisa ‘o le Mālō, ni fuafuaga se lua ‘e fuafua ‘i ai. 

Muamua, ‘o le fa’ase’e ‘uma atu ‘o matāfaioi ‘a lea ‘ōfisa ‘e tau’ave ‘e le Matāgāluega ‘o le Te Puni Kokiri, le matāgāluega fa’apitoa mō matā’uupu tau tagata Māori, ma ‘aveatu ai ma le aofa’iga ‘e to’a 44 ‘o le ‘aufaigāluega, ma
lona lua, ‘o le toe fa’atūlagaina lea ‘o le ‘Ōfisa lenei ‘o le Te Arawhiti, ‘ina ‘ia āga’i tonu ana gāluega ‘i le tagofia ‘o matā’upu ‘e a’afia ai taui ‘o talosaga ‘uma ‘i lalo ‘o le Feagaiga ‘o Waitangi, fa’apea ai ma taui ‘o talosaga tagata Māori ‘i lalo ‘o le Tūlāfono ‘o Takutai Moana ‘e a’afia ai taumafa ma ālāmanuia mai le sami ma le gātaifale, mā ‘o le ‘ā soloia ai le aofa’iga ‘e 51 ‘o tūlaga tofi po’o gāluega ‘o lo’o iai nei, ‘ae fa’avaeina ai ni tūlaga tofi fou se valu. 

‘E fā vāiaso ia ‘ua tu’uina atu ‘i le ‘aufaigāluega ‘a lenei ‘ōfisa, ‘e fa’aalia ai ni o lātou manatu ma ni lagona ‘e tusa ‘o nei fuafuaga ‘e lua. ‘O se vāega lenei ‘o fuafuaga ‘a le faigāmālō, ‘e fa’aitīitia tupe alu ‘i le fa’atinoina ‘o gāluega fai ‘a le Mālō, talu ‘ona tūlai mai ‘i le pūlea ma le fa’afoega ‘o le Mālō.

‘O fa’amaumauga mai le Mālō, ‘ua iloa ai ‘o le vā ‘o le māsina ‘o Tēsema ‘i le tausaga talu ai ma Iuni ‘o le tausaga nei, ‘e sili atu ‘i le 2,000 afe le aofa’iga ‘o gāluega ma tūlaga tofi ‘ua soloia ma lē toe fa’aauauina ‘i totonu ‘o matāgāluega ma fa’alāpotopotoga ‘a le Mālō ‘o Niu Sila.

 Link to RNZ (article) translated by Savelina Kasiano:https://www.rnz.co.nz/news/political/532566/te-arawhiti-the-office-for-maori-crown-relations-set-to-lose-more-than-50-roles

Ata: Photo: RNZ / Quin Tauetau