50% le pa’ū ‘o tiute ‘o Tapa’a o HTP

‘E 50 pasene ‘ua fa’apa’ū ‘ese ‘e le Minisita ‘a le New Zealand First, Casey Costello, mai lāfoga po’o tiute ‘o tapa’a ia ‘ua ta’ua ‘o Heated Tobacco Products  po’o tapa’a ‘e fa’avevela ‘e ese mai sikaleti ‘e susunu.  ‘O le fa’anaunauga ‘o le minisitā ‘ina ‘ia tōsina tagata ulaula ‘i ia itū’āiga ‘o tapa’a ‘e fa’aitīitia ai le ulaula sikaleti. 

‘O Costello, ‘o le Minisitā Lagolago mō le Soifua Mālōlōina, mā ‘o le Minisitā mō le ‘Ofisa ‘o Tiute, na ia fa’apa’ūina le lāfoga po’o le tiute ‘i ia ‘oloa, ‘āmata mai le aso 1 Iūlai, ma ‘ua līpotia ‘e Gyon Espiner ‘o le Leitiō Niu Sila, na tu’uina ‘ese gūgū atu lava lea lāfoga mai luga ‘o le ‘upega tafā’ilagi ‘a le ‘Ōfisa ‘o Tiute.  ‘Ae na fa’aalia ‘e Polōfesa Janet Hoek ‘o le Soifua Mālōlōina Lautele ‘i le Iunivesitē ‘o Otago, ‘e fōliga mai ‘o lea fa’ai’uga, ‘e manuia ai kamupanī tapa’a.  ‘E le’o se fautuaga lea mai le Matāgāluega ‘o le Soifua Mālōlōina.  ‘E mautinoa lava ‘o se fautuaga ‘e talafeagai lelei ma tūlaga ‘e fiafia ai kamupanī tapa’a. 

‘O le kamupanī tapa’a tele ‘a le Philip Morris, ‘e iai sa lātou itū’āiga ‘o tapa’a ‘e pito lauiloa’ i le ‘au ulaula ‘i ia itū’āiga ‘o HTP, ‘e ta’ua ‘o le IQOS, lea ‘e tu’u ai lā’au (sticks) ‘o tapa’a ‘i totonu ‘o se masini ma fa’avevela ai, ‘ae lē susunuina. ‘Ua leva ‘ona fīnau le Philip Morris ‘e fa’apa’ū le tau ‘o tiute ‘i ia itū’āiga tapa’a, ma sā o lātou fa’ailoa atu ‘i le Tax Working Group ‘i le 2018, ‘e tatau ‘i le Mālō ‘ona ‘āmataina se lāfoga ‘e matuā mauālalo ifo mō tapa’a fa’avevela nai lō le lāfoga po’o tiute mō isi tapa’a ‘e tusa ai ma līpoti ‘a le Leitiō Niu Sila.

ATA: RNZ.