$45 miliona lāfoga ‘e le’o fa’ailoaina ‘i pisinisi tau ‘i fa’ato’aga mai le 10 māsina talu ai

‘Ua māua ‘e le Matāgāluega ‘o Tupe Maua, le tusa ma le $45 miliona ‘o lāfoga ‘e le’o fa’ailoaina, mai ‘au’aunaga fa’apisinisi tau ‘i fa’ato’aga ‘i le 10 māsina talu ai.  Na fa’aalia ‘e le so’o’upu, Tony Morris, na o lātou molimauina lava ni fa’atinoga sā atugalu ‘i ai ‘i totonu ‘o ia pisinisi, pei ‘ona aofia ai tagata na totogi ‘i tīnoi tupe po’o faiga ‘e lē tusa ai ma le tūlāfono. 

‘O nisi ‘o ia pisinisi, ‘o lo’o taumafai lava talu mai le afā ‘o Kapelielu ma fa’afeagai fo’i ma le si’itia ‘o tau ‘aemaise ‘o le lē lava ‘o tagata faigāluega.  ‘O le ala lea ‘e fa’amulimuli ai lava le totōgiga ‘o lāfoga.

Sā molimauina fo’i ‘e le ‘Ōfisa ‘o Lāfoga le lē sa’o ‘o līpoti ‘o fa’atauga ia ‘e fa’aaogā ai tīnoi tupe ma ‘e le’i ‘ave’eseina fo’i lāfoga sā tatau ‘ona ‘ave’ese mai tupe ia ‘e maua mai ‘i fa’atauga, pe sesē lāfoga na ‘ave’ese po’o le lē fa’ailoaina atu fo’i pei ‘ona fa’ailoa ‘e Morris.  ‘E māsani ‘ona fa’afaigāluega ‘e le ‘au fai fa’ato’aga tagata ‘e ala atu ‘i kamupanī ia ‘e fa’akonekarate ma ‘o le saunoaga ‘a Morris, ‘o kamupanī ia ‘o lea ‘e taumafai ‘e nanā ia tupe.

Link to RNZ (Article) translated: https://www.rnz.co.nz/news/country/564499/inland-revenue-finds-45-million-of-undeclared-tax-in-horticulture-industry-from-last-10-months

ATA: Supplied / RNZ.