35 faleoloa ‘a le New World ‘e ono tāofia laisene fa’atau ‘ava mālosi mō sina taimi

‘E 35 fale’oloa ‘a le New World ‘i le Motu ‘i Saute, ‘o lo’o talosaga leoleo ‘e fa’amālōlō a lātou laisene ‘e fa’atau ai le ‘ava mālosi mō aso ‘e lima. 

Na tā’ua ‘e leoleo, ‘e tele supamāketi ‘i le Motu ‘i Saute ‘o lo’o fa’atino a lātou gaioiga ‘i ni faiga mata’utia ‘e ala ‘i le fa’alauiloaga ‘o a lātou ‘oloa.  ‘Ua solia ‘e ia fale’oloa le Tūlāfono ‘o le Fa’atauga ‘o ‘Ava mālosi.  Sa fa’asalalauina ‘i luga ‘o ‘upegatafā’ilagi le ‘ava mālosi ‘o le DB Export Gold ma le Ultra Low Carb ‘i le aso 9 Ianuari, sā aofia ai le 26.1 pasene ‘ua pa’ū ai le tau mō tagata ‘e iai a lātou club cards.  ‘Ae ‘i lalo ‘o le vāega 237 1B ‘o le tūlāfono, ‘o le fa’alauiloaga ‘o pa’ū ‘o ‘ava mālosi ‘e i luga atu ‘o le 25 pasene, ‘e lē fa’atagaina vaganā ‘o lo’o faia ‘i nofoaga fa’apitoa ‘ua iai laisene ‘e pei ‘o pā pia ma fale’aiga ma isi nofoaga.  Na māe’a ‘i le Aso Lua le fa’agāsologa ‘o le matā’upu ‘i luma ‘o le Pūlega mō Laisene ma Tūlāfono mō ‘Ava Mālosi ‘i le Fa’amasinoga fa’aitūmālō ‘o Kalaiesetete mā ‘o le ā āga’i ai ‘i lātou ‘o gālulue ‘e fa’amālosia le tūlāfono mō le ‘ōfisa ‘o leoleo, ‘e talosaga le fa’amālōlō ai ‘o laisene ‘e fa’atau ai ‘ava mālosi mō aso ‘e lima ‘a ia fale’oloa ‘e 35 ‘i le Motu ‘i Saute pei ‘ona iai ‘iā lātou fa’amatalaga ‘i le iloiloga ‘o le matā’upu.  ‘O lo’o tatālia le fa’ai’uga ‘a le fa’amasino Simon Menzies ‘i se aso ‘o mulimuli mai.

Link to RNZ (Article) translated by Savelina Kasiano: https://www.rnz.co.nz/news/national/524352/police-seek-five-day-liquor-licence-suspensions-for-35-south-island-new-world-stores

ATA: Sāmoa Capital Radio (file).