$32,200 na pa’ū ai le tau ‘o fale ‘i totonu ‘o Niu Sila ‘i le tausaga na fa’ai’uina ‘i le māsina ‘o Tēsema na se’i mavae atu nei.

‘O le fua fa’atatau ‘o le tau ‘o fale ‘i totonu ‘o Niu Sila ‘i le tausaga na se’i  mavae atu nei, ‘e $32,200 tālā na pa’ū ai ‘i lalo, ‘e tusa ‘o le līpoti mai le fa’alāpotopotoga ‘e tā’ua ‘o le Corelogic.  ‘O le tau ‘o fale na pa’ū le 0.2 pasene ‘i le māsina ‘o Tēsema na se’i mavae atu nei, ‘o le fa’aiva ai lea ‘o pa’ū ‘i totonu ‘o le sefulu māsina ‘ua mavae.

‘O lea aofa’iga na o’o ai ‘i le 3.9 pasene ‘ua maualalo ai nai lō le tūlaga sā iai ‘i le lua tausaga talu ai, ‘ae 17.6 pasene ‘ua maualalo ai nai lō le taimi na soso’o ma le vevela ‘o le fa’ama’i ‘o le Kōviti-19.
Mō Tēsema lava ia, na si’itia le tau ‘o fale ‘i Hamilton ‘i le tasi le pasene, ‘a’o Tauranga na si’itia ‘i le 0.4 pasene ma Dunedin ma si’itia ‘i le 0.3 pasene. 

Peita’i lā, ‘o ‘Aukilani na pa’ū le 0.4 pasene ‘a’o Uēligitone, na pa’ū le 0.7 pasene.  Na fa’ailoa mai ‘e le ali’i ‘ōfisa sīnia ‘o le Corelogic ‘o Kelvin Davidson, ‘o le tele ‘o fale ‘o lo’o fia fa’atauina atu ‘i totonu ‘o ‘Aukilani, ‘ātoa ai ma fale fou ‘o lo’o fausia, ‘o lo’o tāofiofia ai le si’itia ‘o le tau ‘o fale ‘i lea ‘a’ai tele ‘o le atunu’u.

‘Ae ‘i le laumua ‘i Uēligitone, ‘ua maitauina se tūlaga lelei mō tagata ‘o lo’o fia maua ni fale, ‘ina ‘ua soso’o tausaga ‘e lima ‘o maitauina le pa’ū ‘i lalo ‘o le tau ‘o fale.  Mō le tausaga na se’i mavae atu nei, na pa’ū le 6.2 pasene ‘o le tau ‘o fale ‘i totonu ‘o ‘Aukilani, ‘o Tauranga ‘e 3.8 pasene le pa’ū na fa’amauina ai, ‘a’o le laumua lava ia ‘i Uēligitone, ‘e 6.2 pasene.

Link to RNZ (Article) translated by Lauano Ilaoa: https://www.rnz.co.nz/news/business/538092/how-much-house-prices-dropped-in-2024

 ATA: Photo: RNZ / Nate McKinnon