30 pasene le National ‘i taunu’uga lata mai ‘o le su’esu’ega ‘o manatu ma lagona ‘o le ‘au palota

‘I matā’upu tau ‘upufai’omālō, ‘e 30 pasene ‘ua o’o iai le tūlaga lagolagoina ‘o le pātī ‘a le National ‘i le su’esu’ega lata mai nei ‘o manatu ma lagona ‘o le ‘au palota, ‘ae ‘ua ātagia ‘i lea su’esu’ega, ‘e lē maua ‘e le faigāmālō so’ofa’atasi ‘o lo’o tū nei ‘i le foe, le fuainumera ‘e tau’aveina ai se faigāmālō fou.

‘Ua fa’amatalaina ‘e le ‘au fa’asalalau le taunu’uga ‘o lenei su’esu’ega, ‘o le ‘amataga ‘o se vaiaso tāua mō le tofi palemia ‘o Tuisinavemauluomoto’otua Christopher Luxon.

‘O le taunu’uga ‘o le su’esu’ega po’o le survey lenei, ‘a le 1News-Verian poll, ‘ua fa’amatalaina, ‘o se taunu’uga aupito ‘i fa’aletonu lea mō le pātī ‘a le National talu ‘ona tūla’i mai Luxon ‘e ‘avea ma ona ta’ita’i ia Nōvema ‘o le tausaga ‘e 2021.

‘E 5 points na fa’aopoopo mō le pātī ‘a le Labour lea ‘ua tūla’i mai ai latou ‘i le 37 pasene, a’o le 30 pasene ‘a le National ‘e tusa ‘ua 4 points ‘ua pa’u ai ‘i lalo talu mai le māsina ‘o Fepuari.

‘O isi pātī ‘o le faigāmālō so’ofa’atasi, ‘o lo’o tūmau le NZ First ‘i le 10 pasene, a’o le ACT na pa’u le lua points ma tūla’i mai ai nei ‘i le 7 pasene.

A’o isi pātī ‘o le itū āgai, ‘o le Greens ‘o lo’o tūmau ‘i le 11 pasene a’o le Te Pātī Māori, ‘e leai fo’i se suiga ‘i le lua pasene ‘o lo’o iai nei.

‘A fa’aliliu pasene ia ‘i nofoa ‘o le Palemene, pe ‘ana fai ‘i le asō le palota, ‘o lona uiga ‘e maua ‘e le itū āgai ‘i lalo ‘o le ta’ita’iga ‘a le Labour āofia ai le Greens ma le Te Pātī Māori, ia nofoa ‘e 66, fa’atusa ‘i le 58 ‘o nofoa mō le faigāmālō so’ofa’atasi.

‘Ua telē fo’i le āfaina ‘o le tūlaga ‘o le ta’ita’iga ‘a le ali’i palemia ‘i le taunu’uga ‘o lenei su’esu’ega, ‘e 16 pasene lea ‘ua pa’u iai le lagolagoina ‘o Luxon tusa ‘e fā points ‘ua pa’u ai nai lō le tūlaga sa iai, a’o le ta’ita’i ‘o le Labour ‘iā Chris Hipkins ‘e 19 pasene ‘o lo’o iai.

Ua soso’o su’esu’ega nei ‘oi lalo pea ‘i le 29 pasene le lagolagoina ‘o le National, ‘o le tūlaga lea na iai ‘i le pō ‘o le Aso Sā ‘e 29.7 pasene ‘ae ‘ua fa’a’atoa ‘i le 30 pasene pei ‘ona iai nei.

Sa mausalī le tali ‘a le ali’i palemia, ‘e le ‘o manatu ‘e fa’amāvae mai lona tofi, ‘ina ‘ua fesiligia ‘e le ‘au tusitala talu ia su’esu’ega.

‘Ae ‘o le Aso Faraile talu ai sa toe tuliloaina ai fo’i ‘e le ‘au tusitala ‘ina ‘ua ālia’e mai ‘i se lipoti ‘a le NZ Herald, ‘e tusa ‘o se taumafaiga ‘a nisi ‘o faipule ‘e fa’asaga ‘i lana ta’ita’iga ‘o le pātī ‘a le National.

‘O le su’esu’ega lenei ‘a le 1News-Varian poll, na fa’amuta ‘i le Aso Lulu talu ai, ‘o lona uiga latou te le’i maua mea ia na tutupu ‘i le Aso Faraile ‘e a’afia ai le ali’i palemia ma lana ta’ita’iga.

‘O ia tūlaga ‘ua manatu ai le ‘au fa’asalalau, ‘o le ‘a tele ni fesili ‘o le ‘a feagai nei ma Tuisinavaemaulumoto’otua ‘i le ‘amataga ‘o lenei vaiaso fou.

Link to RNZ (Article) translated: https://www.rnz.co.nz/news/political/592799/national-luxon-fall-in-latest-poll-coalition-trails-left-bloc

ATA: RNZ.