29 meth ‘lollies’ na maua ‘i le taimi nei, tasi ‘o lo’o lisiina mō le fa’atau

‘E o’o mai ‘i le pō anapō ‘ua o’o atu ‘i le 29 lole po’o ni poloka ‘o pauta ‘o fuālā’au fa’asāina ‘o le methamphetamine, ‘ua maua e le Auckland City Mission ‘e tusa ai ma līpoti.

‘O poloka ‘o pauta po’o fuālā’au fa’asāina ‘o le methamphamine na āfīfī ma tūsia ai ‘e fa’apea ‘o ni lole ‘e gaosi mai fala pei ‘ona fa’alaua’itele ‘i tala fou ‘o lenei vāiaso. ‘E to’atolu tagata ‘o lo’o ‘i le falema’i talu ‘ona taumafaina ia lole, ‘e to’alua tamaiti, ma le tamaititi ‘e to’atasi ‘o lo’o faia siaki talu ‘ona māe’a ‘ona ia tofoina ia lole. Na āfīfī ia fuālā’au fa’asāina ‘e fa’afōliga ‘i ‘oloa ‘o taumafa ‘a le kamupanī Meleisia ‘o le Rinda Food Industries.  ‘I se pepa ‘o fa’amatalaga na tā’ua ai ‘e le pule sili ‘o lea kamupanī, ‘ua o lātou logotala ‘i lea matā’upu ‘e ala ‘i līpoti ma tala fou ‘i Niu Sila. Ma sā fa’amanino ai ‘e le ali’i pule Steven The, ‘e lē fa’aaogāina ‘e le Rinda Food ni fuālā’au fa’asāina ‘iā lātou ‘oloa.  Ma ‘o le ‘ā o lātou gālulue ma leoleo ‘a Niu Sila ‘e sa’ili le fa’apogai ‘o le fa’afītāuli ma puipui ‘i le igoa ‘o la lātou pisinisi.  Na tā’ua ‘e leoleo, ‘o fuālā’au fa’asāina nei na tufatufaina, ‘e telē lava le tūlaga lamatia ‘o le atunu’u ‘e maua ai mā ‘e le’o tu’umāmāina ‘e la lātou matāgāluega lenei matā’upu.  ‘O lo’o fa’aauau ‘ona lātou aoina uma lole po’o fuālā’au fa’asāina nei sā maua i ātigipusa ‘o taumafa.

Link to RNZ (Article) translated by Anna Fa’asolo: https://www.rnz.co.nz/news/national/525243/29-meth-lollies-found-so-far-one-listed-for-sale

ATA: Supplied / Sarita Kaukau (RNZ).