282 talavai na tūsia ‘e le fōma’i mō ia, ana uō ma ‘āiga fa’asolitūlāfono

Na tūsia ‘e se fōma’i ‘i Hamiltone ni pepa talavai ‘e 282 mō ia, fa’atasi ai ma pepa talavai mō ana uō ma lona ‘āiga, ‘e aofia ai vailā’au ‘e fesoasoani iā te ia, ‘e taofia ai le taumafaina ‘o se ipu uaina ‘i le aso. ‘O isi vailāʻau ‘e aofia ai vailāʻau faʻatonutonu ‘e pei ‘o le codeine, vailāʻau ‘e mafai ‘ona fa’aaoga sesē ‘e tagata ‘e pei ‘o le opioid tramadol, ma vailāʻau po’o Fuālā’au ‘o mea tīgā ‘e seāseā fa’atauina atu ‘i tagata, le psychotropic.

‘O lo’o taofia le fa’alauiloaina ‘o le suafa ‘o lea foma’i ‘i le taimi nei, ‘ae ‘e silia ma le 8 tausaga talu ona ia tūsia pepa talavai fa’asolitūlāfono, ma ‘e to’atele tagata ‘o lona ‘āiga ma ana uō, na fa’aaogāina talu mai le 2020. ‘E 197 talavai na tūsia mō ia lava, ma le 81 na tūsia ‘i lalo ‘o le igoa ‘o lana pā’aga, ‘e ui ‘ina lapata’ia ‘e le Medical Council ‘i le 2014, ‘e lē talafeagai. Na ia tūsia fo’i talavai mō ana uō ‘e to’afā, mō kulimi ‘e tapē ai siama, pei ‘ona fofogaina ‘i le fa’amasinoga mō matā’upu tau ‘i le soifua mālōlōina le Health Practitioners Disciplinary Tribunal ‘i Hamiltone ‘i le Aso Lua.

‘E lē mafai ‘e fōmaʻi ‘ona tūsia talavai mō ‘i lātou lava, fa’apea uō ma ‘āiga, ‘i lalo ‘o le tūlāfono ‘a le Medical Council.’O lē ‘o lo’o mōlia ‘e le’o se GP, ma na maua ‘i su’esu’ega na ia tūsia se talavai mō vailā’au ‘o le antihistamine ‘i lalo le igoa ‘o lana uō, ‘ae fa’aoga mō lana fānau lāiti ma le pepe. ‘O ia vaiā’au ‘e lē saogalēmū mō tamaiti ‘e i lalo ifo ‘o le ta’i lua tausaga, ‘ona ‘e tele a’afiaga ‘e mafai ‘ona maua ai, ‘e iai le āfaina ‘o le mafaufau, koma, a’afiaga ‘i le mānava ma ‘e ono māliliu ai. ‘O lo’o fa’aauau su’esu’ega ‘o lea matā’upu ma ‘e le’i mautū mai se aso ‘e toe vala’auina ai ‘i luma le fa’amasinoga.

Link to RNZ (Article) translated by Anna Fa’asolo: https://www.rnz.co.nz/news/national/528889/doctor-found-guilty-of-misconduct-after-writing-282-prescriptions-for-herself-friends-and-family

ATA: Sāmoa Capital Radio (file).