250 tagata ‘āuai ‘i le tete’e ‘i le St Paul Cathedral ‘i Ueligitone

‘E tusa ma le 250 le aofa’iga ‘o tagata sā ‘āuai ‘i se tete’e fīlēmū ‘e fa’asaga ‘i le fuafuaga ‘a le Mālō ‘e fa’amālosia ai ‘ona ‘ave’esea tagata ‘e lēai ni ‘āiga ‘o lo’o momoe solo ‘i polotito ‘o fale’oloa ma fale ‘o le mālō ‘i Uēligitone.

‘O ia tagata ‘uma fa’apea ma le 50 ma ona tupu ‘o isi tagata sā fesoasoani ma lagolago ‘i ai, sā fa’atino la lātou tete’e ‘i se mafutaga sā faia ‘i totonu ‘o le malumalu ‘o le St Paul Cathedral ‘i le laumua ‘i Uēligitone.

‘O nisi ‘o ‘āiga sā ‘āuai ma fānau na toe fo’i ‘i o lātou ‘āiga ‘ina ‘ua ‘uma sāuniga ma polokalame sā fa’aleo ai o lātou lagona ‘e tusa ‘o lenei fuafuaga ‘a le Mālō, ‘ae ‘o le to’atele lava na tōfafā ai.

‘O le agaga ‘autū ‘o lenei tete’e fa’alaua’itele, ‘e ta’u atu ai ‘i le faigāmālō, ‘e lē se fa’ai’uga lelei ma talafeagai le fa’amālosia ‘o le ‘ave’esea ‘o tagata nei mai nofoaga ‘o lo’o fa’amautū ‘i ai ‘i totonu ‘o le taulaga.

‘E manatu ‘i lātou ‘e lē ‘o le tali lea ‘o le fa’afītāuli lenei, ‘ae tatau ‘i le faigāmālō, ‘ona faia se togafiti ‘o lenei fa’alētonu, ‘o le lēai ‘o ni fale ‘e nonofo ai se vāega to’atele ‘o le atunu’u, ‘e lē gata ‘i le laumua ‘i Uēligitone nei, ‘a’o isi ‘a’ai tetele ‘uma ‘o Niu Sila.

‘O le matā’uupu lenei, ‘e pei ‘ona fa’ailoa mai ‘e le Mālō, ‘o le ‘ā fa’aaogā ai ‘e leoleo ni mālosi’aga fa’apitoa ‘o le Tūlāfono ‘e lapata’ia ai tagata ‘uma ‘e maua ‘o momoe ‘i luma ‘o polotito ma vāega ‘o fale’oloa ma fale ‘o le mālō ‘i ‘a’ai tetele ‘uma ‘ina ‘ia tu’ua ia nofoaga ‘ae su’e se isi mea ‘e fa’amautū ‘i ai ‘i le pō.

‘O lātou ‘e lē ‘usita’ia ia poloa’iga, ‘e mafai ‘ona fa’asalaina ‘i le sala tupe ‘e o’o ‘i le $2,000 afe Tālā, po’o le falepuipui ai mō le ‘umi ‘e tolu māsina.

‘O le mafutaga tete’e lenei ‘i Uēligitone sā fa’amāopoopoina ‘e le mafutaga ‘o ‘ekālēsia ‘ese’ese ‘i totonu ‘o le laumua.

Link to RNZ (Article) translated: https://www.rnz.co.nz/news/top/590958/move-on-orders-protesters-hold-overnight-vigil-in-wellington-cathedral

ATA: RNZ / Russell Palmer