$250 miliona tala ‘o le ‘a fa’atelē ai le nofoaga ‘e tausi ai afi ‘o va’alele ‘i Kalaiesetete

‘E $250 miliona tālā le tau ‘o le ‘ā fa’atelē ai le nofoaga ‘e fa’aleleia ai ma tausia afi ma tino ‘o va’alele ‘i le ‘a’ai ‘o Kalaiesetete.  ‘O le nofoaga lenei le Christchurch Engine Centre, ‘e fa’afoeina fa’atasi ‘e le kamupanī ‘o le Air New Zealand ma le kamupanī ‘Amerika ‘e igoa ‘o le Pratt & Whitney.

‘O le ali’i palemia ‘iā Christopher Luxon ma le ta’ita’ifono ‘o le komiti fa’afoe ‘o le Air New Zealand ‘o Dame Therese Walsh ma le peresetene ‘o le kamupanī ‘a le Pratt & Whitney, ‘o Shane Eddy na o lātou suatia le ‘ele’ele ‘i le vāega ‘o le ‘ā fausia ai lenei gāluega tele.  Na fa’aalia mai ‘e le ta’ita’ifono ‘o le Air New Zealand, ‘o le fa’atelēina ‘o lenei nofoaga, ‘o le ‘ā mafai ai ‘ona fa’atino le fa’aleleia ‘o afi tetele ‘o va’alele, ma mafai ai ‘ona fa’atino ‘i Niu Sila nei le tele ‘o isi gāluega tau va’alele ‘o lo’o ‘ave ‘i atunu’u ‘i fafo ‘e faia ai.

‘O le lua tausaga ‘o lumana’i, ‘o lo’o fa’amoemoe ‘e tatau ‘ona māe’a ai le gāluega ‘ua ‘āmatalia nei ‘i le fa’alauteleina ma le fa’atelēina ‘o lenei vāega fa’apitoa mō le fa’aleleia ai ‘o afi ‘o va’alele, ‘i le ‘a’ai ‘o Kalaiesetete.  ‘O le ‘ā mana’omia ai le isi 200 ‘o tagata faigāluega tomai fa’apitoa, na fa’aalia ai ‘e le ali’i palemia ‘iā Christopher Luxon, ‘o lenei ātīna’e ‘e atagia ai le tele ‘o le sao ‘o le Air New Zealand fa’apea ai ma le kamupanī ‘a le Pratt & Whitney ‘i le tamāo’āiga ‘o Niu Sila. Mā ‘o le ‘ā fa’alautele atu ai ma le tūlaga gafatia ‘e Niu Sila ‘o le tele ‘o gāluega tau va’alele.

Link to RNZ (Article) translated by Lauano Ati Ilaoa: https://www.rnz.co.nz/news/business/533238/christchurch-engine-centre-to-get-250-million-expansion

ATA: RNZ. An Air New Zealand A320: 123RF