2000 āfīfī na fa’aleagaina ‘ina ‘ua mū se ta’avale tiliva meli

‘E tusa ma le 2000 le aofa’iga ‘o meli ma āfīfī na fa’aleagaina ‘ina ‘ua mū se ta’avale tiliva meli ‘a le NZ Post ‘i le vāiaso talu ai.  Na mū le ta’avale ‘i Te Kuiti ‘i le vaveao ‘o le aso 31 Iūlai, ‘a’o iai ni āfīfī na fa’amoemoe ‘e tiliva ‘i ‘Aukilani, Waikato, Bay of Plenty ma Taupō, pei ‘ona tā’ua ‘e le NZ Post, ‘e tusa ai ma līpoti ‘a le Leitiō Niu Sila. 

Peita’i, na fa’ato’ā iloa ‘e Toni Cox, lē ‘e ana le pisinisi ‘o le Beauty Bliss ‘i le vāiaso na soso’o ai, ‘ina ‘ua fa’ao’o atu ni fa’aseā ‘a tagata sā fa’atali a lātou ‘oka ma su’e āga’i ‘i le polokalame ‘a le NZ Post, ‘e sa’ili ai po’o fea ‘ua o’o ‘i ai a lātou meli.  Na tā’ua ‘e Cox, na telefoni ‘i le NZ Post, ‘afa ītūlā ‘o fa’atalitali, ‘ae maua atu le ‘īmeli ‘i le taeao ‘o le Aso Lulu, ‘e ta’u atu ai, sā iai se fa’alavelave mā ‘ua lē toe maua a lātou āfīfī, ma ‘e tatau ‘ona fai ni a lātou talosaga ‘o meli ‘ua lē maua.  ‘Ona ‘o le tele atu ‘o isi fa’aseā, na fesiligia ai ‘e Cox le sui ‘o le NZ Post mō nisi fa’amatalaga.  Ma lafo atu ai loa le pepa ‘o fa’amatalaga, na ta’u atu ai le ta’avale meli na mū ‘i Te Kuiti, ma mū atu ai ma āfīfī ‘e 1500.  Na fa’amaonia ‘i se fa’amatalaga ‘a le NZ Post le tala na fa’ailoa atu ‘i le ‘īmeli peita’i, na toe fa’asa’o le fuainūmera, ‘e fa’apea ‘e 2000 le aofa’iga ‘o āfīfī na fa’aleagaina.  ‘O lo’o su’esu’eina ‘e le NZ Post le māfua’aga ‘o le mū peita’i ‘o lo’o lelei ‘uma pepa fa’amaonia ‘o le tūlaga lelei ‘o a lātou ta’avale tiliva meli ma ‘e masani fo’i ona siaki.

Link to RNZ (Article) translated by Savelina Kasiano: https://www.rnz.co.nz/news/national/524430/nz-post-truck-catches-fire-2000-parcels-destroyed

ATA: Supplied via NZ Post / RNZ.