170 ‘o le ‘ā vāea mai Leoleo ‘e fa’asao ai le $53 miliona

‘O lo’o iloilo ‘e le Matāgāluega ‘o Leoleo Le vāea ‘o gāluega ‘e 170, ‘e mafai ai ‘ona fa’asao se vaegātupe ‘e $53 miliona mō le silia ma le 4 tausaga, ‘ina ‘ia fa’amalieina ai le mana’oga ‘o le mālō ‘e fa’aitīitia ai pāketi. 

Na saunoa le Komesina Andrew Coster, ‘e le’o aofia ai ‘au’aunaga ‘e fesāga’i ma tagata, ‘i le fautuaga mo suiga lea na tu’uina atu ‘i le ‘aufaigāluega ‘i le Aso Lua.  Sa le’i taliaina ‘e le Komesina se fa’atalanoaga ma le Checkpoint, le polokalame ‘a le Leitiō Niu Sila peita’i ‘i sa lātou pepa ‘o fa’amatalaga ‘o lo’o fa’aalia ai, ‘o lo’o taumau pea la lātou matāgāluega ‘i le fa’atinoga ‘o ‘au’aunaga ‘autū.  ‘O suiga ‘o lo’o tu’uina atu fa’afautuaga, ‘e aofia ai le fa’ata’ape po’o le fa’amuta ‘o gāluega ‘e 248 ‘e aofia ai le 128 ‘o lo’o avanoa ‘i le taimi nei.  ‘Āmata ni gāluega fou se 78.  ‘O lona uiga, ‘e 170 gāluega ‘o le ‘ā fa’amālōlō mai lea aofa’iga.  Peita’i na fa’ailoa ‘e le Komesina, ‘o le ‘ā lē iloa le atoaga ‘o tupe ‘e mafai ‘ona fa’asao se’ia māe’a faigā fa’ai’uga mulimuli ‘i le māsina ‘o ‘Oketopa.  ‘O le ‘ā fa’agāsolo fa’atalanoaga ‘i le isi tolu vāiaso ‘o lumana’i.

Link to RNZ (Article) translated by Savelina Kasiano: https://www.rnz.co.nz/news/national/525777/police-to-axe-170-roles-in-bid-to-save-53-million

ATA: Police commissioner Andrew Coster. RNZ / Samuel Rillstone