168 afe tālā totogi ‘o so’o’upu mō le Matāgāluega fou ‘a David Seymour 

‘O lo’o fa’afaigāluega ‘e le Mālō ni so’o’upu ‘e tutū ‘i luma ‘o le ‘au tusitala ‘e tali mō ni matāgāluega fou ‘i ni matā’upu ‘ese’ese (spin doctors) ‘i ni totogi tetele ‘e ui ‘i fa’atonuga ‘e fa’aitīitia ai tagata faigāluega ‘a le mālō ‘e pei ‘ona līpotia ‘e le Post. 

‘E o’o atu ‘i le 168,000 tālā ‘i le tausaga, le totogi ‘o se faufautua ‘autū, (principal adviser), mā ‘o se tasi ‘e feagai ma tagata ma feso’ota’iga, mō le matāgāluega fou ‘a David Seymour, ‘o le Ministry for Regulation, ‘e f’aapitoa mō Tūlāfono.  ‘O folafolaga ‘a le Vāega Fa’a’upufai ‘a le ACT ‘i taimi ‘o fa’atōsina ‘o le faigāpālota, sā aofia ai le vāea ‘o tagata faigāluega ‘a le mālō ‘e to’a 15,000.  ‘O lea so’o’upu fou, ‘o le ‘ā gālulue fa’atasi ma nisi ‘aufaigāluega ‘e to’alima mō feso’ota’iga, ‘e aofia ai le to’atolu ‘o ni tagata ‘e gālulue fa’akonekarate (contractors).  ‘O lo’o saili fo’i ‘e le Lālā ‘o le Social Investment Agency ‘a le Minisitā ‘o tupe Nicola Willis, se konesale ‘e galue ‘o se pule mō feso’ota’iga (communications manager), ‘i se totogi ‘e o’o atu ‘i le lata ‘i le $237,000 ‘i le tausaga.  ‘O Mati na fa’atūina ai le Matāgāluega mō Tūlāfono ‘e na te va’aia tūlāfono fou ma tūlāfono ‘o iai ma fa’aitīitia le tele ‘o vāega ‘o faatuai ai auaunaga.  E oo ma ii le faaiuga o Iulai, ua lata i le 6000 galuega ua vaea mai matāgāluega ‘a le mālō, ‘ina ‘ia ‘ausia se pasene na fa’atūlagaina ‘e le mālō ‘e ao ‘ona fa’asaoina mai pāketi ‘a matāgāluega ta’itasi.  ‘E 50 miliona tālā le pāketi ‘a le Social Investment Agency lea ‘ua suia le Social Wellbeing Agency mai le aso 1 Iulai.

Link to The Post (Article) translated by Savelina Kasiano: https://www.thepost.co.nz/a/politics/350378222/david-seymours-new-ministry-red-tape-hiring-168k-year-spin-doctor?lid=z99kgmtpb8rf&utm_source=newsletters&utm_medium=email&utm_campaign=the_post_digi_weekday_bulletin

ATA: JUAN ZARAMA PERINI / THE POST.