160,000 tagata fesoasoani ‘i ai le ACC ‘i le tausaga talu ai, ‘i se tau ‘e $2.5 piliona.

‘E 162,571 tagata ‘e le’i faigāluega ‘ona ‘o manu’aga ‘i le tausaga talu ai, ma sā fesoasoani ‘i ai le ACC ‘e tusa ai ma fa’amaumauga fou, ‘i se tau aofa’i ‘e $2.5 piliona. 

‘E silia ma le 18 miliona aso na totogi ai taui ‘i le vāiaso.

‘I lona aofa’iga ‘ātoa, ‘e tusa ma le 1.6 miliona le aofa’iga ‘o tagata ‘i le tausaga, na taliaina ‘e le ACC a lātou talosaga, ma ‘e 7 piliona tālā lona fa’atupega ‘ātoa.  Mai lenā aofa’iga, e $4.4 piliona na fa’aalu ‘i tau mō le toe fa’aleleia ‘o le soifua mālōlōina po’o rehabilitation.  ‘O le tausaga ‘e 2004 sā i lalo ifo ‘o le 1 le piliona tālā.  Na tā’ua ‘e James Whitaker le ta’ita’i ‘o le puipuiga ‘o manu’aga ‘a le ACC, ‘o lo’o to’atele tele tagata ‘ua mānunu’a, ma ‘ua ‘umi atu taimi ma taugatā atu le tau ‘e totogi ‘e le fa’alāpotopotoga. 

Na fa’aalia ‘e le Minisitā ‘o le ACC Scott Simpson na maualuga tele le nūmera ‘o tagata na mānunu’a, peita’i ‘e tele manu’aga sā tatau ‘ona lē tutupu.   ‘O le telē tele ‘o le nūmera ‘o aso ‘e lē faigāluega ai tagata, ‘e lē mafai ai ‘ona ‘ausia ‘e le atunu’u le tūlaga lelei ‘e tatau ‘ona o’o ‘i ai pei ‘ona saunoa le minisitā.

‘O vāega pito sili ‘ona ta’atele ‘i manu’aga ‘o tagata, ‘o le pito ‘i lalo ‘o le papātua ma le tuasivi, 13 pasene, pito ‘i ai tau’au ‘e 8 pasene.  ‘E na’o le 10 pasene ‘o manu’aga, ‘e māfua mai ‘i fa’alavelave ‘i fale faigāluega.  ‘O le lua ‘o vaetolu, ‘e tutupu ‘i totonu ‘o ‘āiga ‘ae lata ‘i le kuata ‘o ia manu’aga, ‘e māfua mai ‘i tā’aloga.  ‘E lata ‘i le 16,000 tagata ‘e ta’i 60 ma ona tupu tausaga na faia ni a lātou talosaga ‘i le ACC po’o le ‘Ōfisa ‘o Fa’alavelave Fa’afuase’i ‘ona ‘o ni fa’alavelave ‘i le faiga ‘o togālā’au.  ‘E i lalo ifo ‘o le 40 pasene ‘o talosaga ‘uma lava ‘i fale faigāluega ‘i le tausaga talu ai, ‘e mai gāluega gaosi ‘oloa, gāluega tetele ‘e pei ‘o fauga ‘o fale, vaomatua, fa’ato’aga ma faigāfaiva.

Link to RNZ (Article) translated: https://www.rnz.co.nz/news/national/564516/acc-supported-160-000-people-at-a-cost-of-2-point-5-billion-last-year-new-data-shows

ATA: RNZ / Angus Dreaver