149 ātīna’e ‘ua pāsia ‘e le mālō ‘e fa’anatinati ma fa’avavevave ‘ona pāsia le fa’ataunu’uina

‘E 149 le aofa’iga ‘o ni ātina’e ma ni gāluega ‘ua filifilia, ‘e ‘ave ‘i ai le fa’amuamua ma pāsia mō le fa’atinoina, ‘i le tūlafono taufa’aofi po’o le pili ‘a le mālō, lea ‘e fa’aigoaina ‘o le fast-track approvals bill.

Na fa’ailoa mai ‘e le minisitā mō gāluega tetele ‘a le mālō, ‘o chris bishop, ‘o gāluega ma ātīna’e ‘uma nei, ‘o le ‘ā fesoasoani tele ‘i le toe fausia ‘o le tamāo’āiga ‘o le atunu’u, ‘aemaise ‘o le fa’aleleia ‘o le fa’afītāuli ‘o mea tau fale, fa’aleleia ‘o le puipuiga ‘o le itū tau ‘i le mālosi’aga, ma fa’aleleia ai le tūlaga ‘o ‘auala ma ‘au’aunaga mana’omia mō tagata ‘uma.

Na tā’ua ai ‘e le minisitā, ‘o le agaga moni lava, ‘ina ‘ia vave ‘ona fa’atinoina nei ātīna’e ma maua ai gāluega ma le tūlaga tuputupu a’e ‘o le tamāo’āiga.

‘O le taimi nei, ‘e le’i pāsia lea pili ‘e le palemene, ‘ona ‘e iai la’asaga ‘e tatau ‘ona fa’atinoina muamua, ‘ae na fa’aalia ‘e bishop, ‘e tatau ‘ona aulia le tausaga fou ‘ua ‘āmata ‘ona fa’atino se vāega ‘o gāluega ma ātīna’e pei ‘ona filifilia nei ‘e le faigāmālō.

Peita’i, ‘o lo’o tē’ena mālosi ‘e le pāti ‘a le labour le pili lenei ‘a le faigāmālō ‘ona ‘o le ‘auala ‘e fa’atino ai le pāsia ma le filifilia ‘o gāluega ‘e tatau ‘ona ‘ave ‘i ai le fa’amuamua.

Na fa’ailoa mai ‘e le sui ‘o le labour mō matā’upu tau ‘i le si’osi’omaga, ‘o dave parker, ‘o le tele ‘o gāluega ma ātīna’e nei ‘ua mana’o le faigāmālō ‘e vave ‘ona pāsia ma fa’atino, na tē’ena muamua ‘e le mālō ‘ona ‘o tūlaga āfāina ai ‘o le si’osi’omaga ‘o le atunu’u.

Link to RNZ (Article) translated by Lauano Ati Ilaoa: https://www.rnz.co.nz/news/political/529962/government-unveils-149-projects-selected-by-fast-track-approvals-bill

ATA: RNZ.