14 nusipepa ‘o le ‘ā tāpunia ‘i nu’u ‘i tua ‘o Niu Sila

‘E tele nusipepa ‘i nu’u ‘i tua ma nusipepa fa’aitūmālō, ‘o le ‘ā tāpunia ‘a’o le’i ‘uma le tausaga nei.  ‘O lea fuafuaga ‘a le kamupanī ‘o le NZME, lea ‘e ona ma pūlea nei nusipepa ‘uma, ‘ua māfua ‘ona ‘e fa’apea ‘ua gau ma lē toe maua ai ni tupe fa’asili po’o ni polōfiti mai le saga lōmia pea ‘o ia nusipepa ‘i itū ‘ese’ese ‘o le atunu’u.  ‘O nusipepa ‘o le ‘ā tāpunia ‘e aofia ai le Te Awamutu Courier, ‘o se lōmiga ‘ua sili atu ‘i le selau tausaga talu ‘ona iai, ‘i lea vāega ‘o Niu Sila.  Peita’i lā, na fa’ailoa mai ‘e le NZME, ‘e lē’o aofia ai ‘i lenei fuafuaga le nusipepa ‘o le Waikato Herald fa’apea ai ma le The Weekend Sun.

‘Ae ‘o nusipepa ‘o le ‘ā tāpunia tūmau ‘e lē toe fa’aauauina ‘e aofia ai le:
• Hauraki Coromandel Post
• Katikati Advertiser
• Te Puke Times
• Taupō and Tūrangi Herald
• Napier Courier
• Hastings Leader
• CHB Mail
• Bush Telegraph
• Stratford Press
• Whanganui Midweek
• Manawatū Guardian
• Horowhenua Chronicle
• Kāpiti News.

‘O lenei fuafuaga ‘ua tele ‘ina faitioina ‘e tagata ‘aemaise ‘o pūlēga ‘o nu’u ma ‘a’ai.  Sā fa’ailoa mai ‘e le tama’ita’i pulenu’u ‘o Central Hawkes Bay , ‘o Alex Walker, ‘o se tūlaga lē manuia tele le a’afia ‘o le lātou nusipepa ‘o le Mail ‘i lenei fuafuaga, ‘ona ‘o le tāua ‘o lana tautua mō feso’ota’iga ‘o tagata.  Na tā’ua ‘e le tama’ita’i pulenu’u ‘o Alex Walker, ‘ua feso’otai ‘o ia ‘i isi fo’i pulenu’u ‘ua a’afia ‘i lenei fuafuaga, mō le fa’atūlagaina ‘o se lātou taumafaiga tu’ufa’atasi ‘e tē’ena ātili ai lenei fa’ai’uga mai le pūlega ‘o le kamupanī NZME, lea ‘e ona nusipepa ‘uma nei ‘i totonu ‘o Niu Sila.

Link to RNZ (Article) translated by Lauano Ati Ilaoa: https://www.rnz.co.nz/news/thedetail/534701/local-newspaper-closures-when-the-heart-of-a-community-folds

ATA: Copies of the Ruapehu Bulletin, the district’s free weekly paper Photo: Robert Milne/Supplied