$11-miliona le tau ‘o vailā’au fa’asāina na maua ‘i le ‘atopa’u ‘a se tama’ita’i mai ‘Amerika

‘E 31 kilokalama ‘o le vailā’au fa’asāina ‘o le methamphetamine na maua ‘i le ‘atopa’u ‘a se tama’ita’i ‘Amerika ‘i le malae va’alele ‘i ‘Aukilani ‘i le fa’ai’uga ‘o le vāiaso.

Na fa’ailoa mai ‘e le ‘Ōfisa ‘o le Tiute, ‘o lenei māfine ‘e 24 tausaga le matua, ‘o se tagātānu’u ‘Amerika na taunu’u ane ‘i ‘Aukilani ‘i le malaga ‘a se va’alele mai le ‘a’ai ‘o San Francisco ‘i le aso 18 ‘o Iānuari, mā ‘o sā’iliga māsani ‘a le ‘ōfisa ‘o le tiute na maua ai le vailā’au fa’asāina lenei ‘ua utu ‘i totonu ‘o ni pepa ‘i’ila ma teu fa’atasi ai ma ona lavalava ‘i totonu ‘o lana ‘atopa’u.

Na fa’aalia ‘e le ‘Ōfisa ‘o Tiute, ‘e o’o atu lava ‘i le $11-Miliona Tālā le tau ‘o lenei vailā’au pē ‘ā fa’atauina atu ‘i tua.  Na tā’ua ai ‘e le pule ‘o le tiute ‘i le malaeva’alele ‘i ‘Aukilani, ‘o Paul Williams, ‘o se aofa’iga maoa’e lenei ‘o ni vailā’au fa’asāina, ‘ua taumafai se tagata ‘e to’atasi ‘e ‘aumaia fa’ananā ‘i totonu ‘o le atunu’u.

‘Ua faia nei mōliaga fa’asaga ‘i lenei tama’ita’i ‘Amerika, ma ‘ua ‘uma ‘ona tūla’i ai ‘i le fa’amasinoga fa’aitūmālō ‘i Manukau ananafi, ma ‘ua taofia ai nei ‘i lalo ‘o le va’aiga ‘a leoleo ‘e fa’atali ai le aso ‘e toe o’o ane ai ‘i le fa’amasinoga ‘i le māsina fou ‘o Fepuari.

Link to RNZ (Article) translated by Lauano Ati Ilaoa: https://www.rnz.co.nz/news/national/539460/auckland-airport-seizure-meth-worth-11m-found-in-us-woman-s-suitcase

ATA: Supplied / NZ Customs