1000 tamaiti ‘e le’o toe nonofo ‘i faletalimālō; ‘ae lē iloa po’o fea ‘o nonofo ai

Na patipatia ‘e le Minisitā mo Social Housing, Tama Potaka ‘i le Aso Sā, le tūlaga ‘e fa’apea ‘ua silia ma le 1000 le aofa’iga ‘o tamaiti ‘ua lē ’o toe ola a’e ‘i totonu ‘o faletalimālō ‘ona ‘o se tasi ‘o gāluega ‘a le faigāmālō ‘o lo’o ta’ita’ia ‘e le National, ‘ina ‘ia fa’aitīitia le nūmera ‘o tagata ‘e nonofo ‘i fale mō ē ‘ua mo’omiaina vave ni fale ‘e nonofo ai (emergency accommodation). 

Peita’i, e le’o mafai ‘ona fa’ailoa’ e lona ‘ōfisa po’o le Matāgāluega ‘o le Ātina’ega ‘o Aga Feso’ota’i, po’o fea lā ‘ua ‘ave ‘i ai ia fānau ‘i le taimi nei, po’o ‘ua ‘ave o lātou ‘āiga ma nonofo ‘i ni fale ‘e fa’apitoa mō tagata ‘e maualalalo tupe maua po’o nonofo fo’i ‘i ni fale nofo mautotogi ‘e lē ‘ūmiaina ‘e le mālō, po’o le lēai fo’i ‘o ni fale ‘o nonofo ai.  ‘E le’o tulituliloaina ‘e le mālō po’o fea ‘o nonofo ai nei ia fānau ‘e ui ‘o la lātou polisi, ‘o lo’o ‘ave ai le fa’amuamua ‘i le ‘ave’esega ‘o ‘āiga ‘e iai fānau iti mai fale ‘o nonofo ai tagata ‘e mo’omiaina vave ni fale ‘ae tu’u ‘i totonu ‘o fale mō tagata ‘e maualalalo tupe maua ma iai ni mana’oga fa’apitoa ‘e alagātatau ai ‘ona nonofo ‘i ia fale.  Na ‘āmataina le polokalame ‘o le ‘ave ‘o tagata ‘e lēai ni fale ‘e fa’anonofo ‘i faletalimālō lāiti ‘i se taumafaiga ‘e tāofi ai le nonofo ‘o fānau iti ma ‘āiga ‘i totonu ‘o ta’avale ma luga ‘o ‘auala tetele.

Link to RNZ (Article) translated by Savelina Kasiano: https://www.rnz.co.nz/news/political/525411/the-government-celebrates-more-than-1000-children-no-longer-growing-up-in-motels-but-can-t-say-where-they-have-gone

ATA: Minister Tama Potaka. RNZ / Samuel Rillstone.