1.3 piliona tālā ‘e su’e ai ‘aveta’avale ‘onanā

‘Ua fa’amoemoe le faigāmālō ‘e su’esu’e fa’ata’ita’i le 3.3 miliona ‘o ‘aveta’avale ‘i le tausaga ‘i la lātou fuafuaga ‘e fa’aopoopo ai su’esu’ega ‘i tafatafa ‘o magāala mō ‘aveta’avale taumafa ‘ava mālosi ma tagofia fuālā’au fa’asāina. 

‘E 1.3 piliona tālā ‘ua ‘inivesi ‘i se Polokalame mō le leolēoga ‘o ‘auala tetele lea ‘o le ‘ā fa’agāsolo mō tausaga ‘e tolu.  Na saunoa le Minisitā ‘o Fela’ua’iga Simeon Brown, ‘e 65 pasene su’esu’ega ‘o le mānava ‘o le ‘ā faia ‘i taimi ‘e pito sili ‘ona lamatia ai soifua ‘ona ‘o le tele ‘o le ‘ava mālosi.  ‘I lalo fo’i ‘o lea polokalame, ‘o le ‘ā fa’amoemoe ‘e fa’atino ai su’esu’ega ‘e 50,000 ‘i le tausaga, mō fuālā’au fa’asāina.  ‘E manino lava le vāega ‘o le ‘ā māta’itū ‘i ni suiga lelei ‘o le ‘ā maua mai ai, mā ‘o le ‘ā fa’amautinoa ai fo’i, le māta’itū ‘e leoleo ‘o taimi ‘e pito sili ‘ona maualuga ai ni tūlaga lamatia ‘e tutupu mai ai, ‘o āmioga ‘a ‘aveta’avale ma vāega ‘o le atunu’u ‘e tutupu ai ia āmioga pei ‘ona saunoa le minisitā.  ‘O le ‘ava mālosi ma fuālā’au fa’asāina, ‘o lo’o nūmera tasi, ‘i māfua’aga ‘e ala ai ‘ona maumau soifua ‘i fa’alavelave ‘i luga ‘o ala tetele.  ‘O le 2019-2022, ‘e tusa ma le 105 tagata ‘i le tausaga na maumau soifua ‘ona ‘o fa’alavelave na māfua mai ‘i ‘aveta’avale na tagofia fuālā’au fa’asāina, ma ‘e tusa ma le 30 pasene, ‘o tagata māliliu ‘i le tausaga ‘i luga ‘o ‘auala tetele.

Link to RNZ (Article) translated by Savelina Kasiano: https://www.rnz.co.nz/news/top/525483/government-announces-1-point-3-billion-crackdown-on-drink-drivers

ATA: Transport Minister Simeon Brown. RNZ / Angus Dreaver