Sui le faiga ‘o visa nofomau mō mātua (parent resident visa)

‘Ua fa’amaonia mai ‘e le Minisitā ‘o Femalāgā’iga, ‘o Erica Stanford, se suiga ‘i le faiga ‘o lo’o faafoe ma pūlea ai le polokalame mō visa nofomau mō mātua.

‘O lea suiga ‘e pei ‘ona fa’ailoa mai ‘e le tama’ita’i Minisitā, ‘e ‘āmata ‘i le māsina ‘o Nōvema, ‘ona filifilia tālosaga ‘e fua ‘i le taimi na faia ai ma fa’aulu atu ‘i le matāgāluega ‘i le vāega fa’apitoa mō mātua ‘o tagata ‘e talosaga, ‘e tā’ua, ‘o le Parent Resident Visa.

‘O le taimi nei ma le faiga sā sau ai le ioiloga ‘o tālosaga nei, ‘e ta’i tolu māsina ma faia le se’i ‘e filifili ai tālosaga ‘e tatau ’ona iloilo ma faia ‘i ai fa’ai’uga, ma ‘umi ai le taimi ‘o tatali le taunu’uga mō le tele ‘o tālosaga ‘e tu’uina atu ‘i le matāgāluega.

‘Ae ‘o le suiga pei ‘ona fa’ailoa mai ‘e le minisitā ‘i le Aso To’ona’i na tea nei, ‘o le ‘ā filifilia ai le 90 pasene ‘o tālosaga nei, ‘e fua ‘i le aso ma le taimi na taunu’u atu ai ‘i le ‘ōfisa, ‘a’o le isi vāega ‘o le ‘ā faia pea ‘i ai le se’i ‘e fa’a’ātoa ai le fuainūmera fa’atapula’a ‘e 2,500 ‘o tagata, ‘e mafai ‘ona pāsia ma talia ‘e nofomau ‘i totonu ‘o Niu Sila, ‘i le tausaga ‘e tasi.

‘O le visa nofomau lenei mō mātua, le Parent Resident Visa, ‘e ‘ese mai ‘i le visa lea ‘e tā’ua ‘o le Parent Boost Visa – lea ‘e mafai ai ‘ona tālosaga tagata ‘ua nofomau ma sitiseni ‘i Niu Sila, ‘e lagolago ma sponsor ai o lātou mātua mō le tūlaga nofomau ‘i totonu ‘o Niu Sila.

‘O le suiga lā ‘e pei ‘ona fa’ailoa mai ‘e ‘āmata ‘ona fa’amamalu ‘iā Nōvema, ‘o le ‘ā lē toe ‘uma ai le aogā ‘o se EOI, po’o se tālosaga mō le fia fa’aaogāina ‘o lea avanoa ‘i totonu ‘o le lua tausaga, pe ‘ā fai ‘e mānana’o ‘i lātou ‘o lo’o a’afia ai, ‘ina ‘ia fa’aauau pea ‘ona iai a lātou tālosaga, ma tu’uina atu fa’amatalaga ‘āto’atoa ‘i le ‘ōfisa ‘i taimi uma.

‘O le ‘ā fa’amuta ai fo’i ‘e lē toe mana’omia, ‘ona totogi ‘e ‘āiga se vaegātupe fa’aopoopo ‘i tausaga ta’ilua ‘uma, mō le toe fa’afouina ‘o ā lātou tālosaga.

‘O le aso 5 ‘o ‘Oketopa, lea ‘e fa’amoemoe ‘e ‘āmata fa’atino ai lenei suiga, ‘ae ‘o le aso 10 ‘o Nōvema, ‘o le ‘ā filifilia ai loa tālosaga muamua ‘o le ‘ā fa’amanuiaina ai.

Na fa’ailoa mai fo’i ‘e fa’apea, ‘e o’o mai ‘i le aso 23 ‘o Iūlai, ‘e 7706 le aofa’i ‘o EOIs ‘o lo’o iai ‘i le lisi ‘o tālosaga mō le se’i mō visa nofomau nei mō mātua, ‘e a’afia ai le aofa’iga ‘e 11,602 tagata.

Link to RNZ (Article): https://www.rnz.co.nz/news/chinese_english/934038/chronological-selection-process-for-parent-resident-visa-confirmed

IMAGE/ATA: RNZ / Samuel Rillstone