Puipui ‘e le Palemia lona fa’aaogāga ‘o le malaga ‘a le Fuāva’atau

‘Ua tali le Palemia Tuisinavemauluomoto’otua Christopher Luxon, ‘e puipui lona fa’aaogāga ‘o se faigāmalaga ‘a le Fuāva’atau ‘a Niu Sila ‘ina ‘ua māe’a se sa’iligātupe ‘a le Vāega Fa’a’upufai ‘a le National.  Na saunoa le palemia, ‘o lana gāluega ‘e matuā pisi tele. 

Na tu’ua’ia ‘e le Labour le palemia ‘i le Aso Lulu ‘i lona fa’aaogāina ‘o le Mālosi’aga Fa’afitafita ‘o se ‘au’aunaga mō ia lava, ‘i ana fa’atōsina. 

Na malaga Tuisinavemauluomoto’otua mai Whanganui mō ‘Aukilani ‘i se va’alele ‘a le Fuāva’atau ‘a Niu Sila ‘e ta’i ono nofoa ‘i le afiafi ‘o le aso 23 Iūlai, ‘ina ‘ua māe’a se taumafataga sa’ilitupe ‘a le National. 

Na saunoa le palemia ‘i le ‘au tusitala ‘i le Palemene, na mo’omia lona toe fo’i ‘i ‘Aukilani mō se fonotaga ‘i le taeao na soso’o ai, peita’i ‘e lēai ni malaga na avanoa ‘a le ‘Ea Niu Sila po’o le Jetstar.  Na ia toe tu’u mai ‘i luma le fono ‘i le fitu ‘i le taeao, ‘ina ‘ia mafai ‘ona ‘āuai ‘i le falelauasiga ‘o se tasi na ‘avea ma faipule ‘o le National, Bill Birch ‘i lea lava aso.

Na ia tā’ua fo’i, ‘e tatau ‘ona femālāga’i ia va’alele, ma ‘e mo’omia fo’i ‘e pailate ītūlā fa’atasi ai ma ni fa’ata’ita’iga po’o a’oa’oga.  ‘E lēai ni tupe fa’aopoopo ‘a le ‘au fai lāfoga ‘o fa’aaluina ai. 

Na tali le ta’ita’i ‘o le Labour Chris Hipkins, sā faigōfie lava ‘ona mafai ‘e Luxon ‘ona fa’amisi le sa’iligātupe ‘a le National, ‘ae malaga ‘i se faigāmalaga ‘a va’alele la’u pāsese mai Whanganui ‘ina ‘ia mafai ‘ona ‘āuai ‘i le fono.  

Link to RNZ (Article): https://www.rnz.co.nz/news/politics/894691/christopher-luxon-defends-using-air-force-flight-after-attending-national-party-fundraiser

IMAGE/ATA: Pool/AFP/Michael Bradley (RNZ).