Musu Vaovasamanaia Winston Peters ‘e fa’ato’ese ‘ina ‘ua ‘uma ‘ona fono ma le Palemia

Na musu Vaovasamanaia Winston Peters ‘e fa’ato’ese ‘i ana saunoaga na lafo ‘i le vāiaso talu ai, ‘e fa’asaga ‘i le faipule ‘a le Greens, ‘o Lawrence Xu-Nan, ‘o se tagatā nu’u Niu Sila ma Saina ‘e ui na saunoa le palemia, ‘o ni fa’amatalaga fa’ailoga lanu.

Na lāgā ‘e Tuisinavemaulumoto’otua Christopher Luxon lea matā’upu ‘i le ta’ita’i ‘o le New Zealand First ‘i le Aso Gafua ‘i se fono na’o ‘i lā’ua.  Peita’i, na le’i mana’o le palemia ‘e fa’ailoa ni au’ili’iliga ‘o lea talanoaga.  ‘E o’o fo’i ‘iā Vaovasamanaia, ‘e le’i mana’o ‘e fa’ailoa matā’upu ‘o lea talanoaga.

‘Ina ‘ua fesiligia pe fa’ato’ese peita’i na tali Vaovasamanaia, ‘e lē fa’ato’ese, ma sā talafeagai lava lana gāioiga ‘ona ‘o le fa’alavelave ‘o le ali’i faipule ‘i le taimi ‘a’o faia lana saunoaga ‘i le Palemene.  Na saunoa Vaovasamanaia, ‘o ia na fai lana fa’amatalaga, ‘e uiga ‘i taimi ia na tāpunia ma loka ai le atunu’u fa’apea ma le fa’aufiufi ‘o ni mea na faia ‘i le iloiloga ‘i le Kōviti, fa’atasi ai ma tagata ‘o le ‘ā mafatia mai ai.  ‘Ae na ‘e’ē leotele atu le faipule ‘a’o faia lana saunoaga.  Mā ‘e lē fa’ato’ese. 

‘I fa’amaumauga āloa’ia ‘i felafolafoa’iga ‘i le Palemene, ‘o lo’o fa’amauina ai, na fa’alavelave Xu-Nan ‘i le saunoaga ‘a Vaovasamanaia ‘e ala ‘i lona ‘e’ē po’o le tauvala’au leotele atu ‘i ai “pe ‘ua fai sona tui puipui”.

Na fa’aalia ‘e le tasi ta’ita’i ‘o le Greens Marama Davidson ‘ua ‘uma ‘ona tusi atu lana vāega fa’a’upufai ‘i le Fofoga Fetalai ‘o le Palemene, Gerry Brownlee, ‘e talosaga ‘i ai, ‘ina ‘ia tatau ‘iā Vaovasamanaia ‘ona tusi āloa’ia ‘e ‘ave’esea ana lafoga ia na fai ma fa’ato’ese.

Link to RNZ (Article): https://www.rnz.co.nz/news/political/882545/winston-peters-refuses-to-apologise-for-racist-comments-after-meeting-with-pm

IMAGE/ATA: RNZ.