$21.7-miliona mō a’oa’oga ‘o faiā’oga

‘E silia ma le $20-miliona se vaegātupe ‘o le ‘ā fa’aalu ‘e le Mālō Niu Sila, ‘e fa’alautele ai le polokalame, mō le a’oa’oina ‘o faiā’oga ‘a’o gālulue ‘i totonu ‘o potu ā’oga.

‘O le tau ‘ātoa ‘o lea polokalame, ‘e pei ‘ona fa’ailoa mai ‘e le Minisitā ‘o Ā’oga, ‘o Erica Stanford, ‘e $21.7-miliona ‘i totonu ‘o tausaga ‘e lima mā ‘o le ‘ā fesoasoani fo’i ‘e maua ai pea ni faiā’oga mō ā’oga ia ‘e faigatā ‘ona maua ni faiā’oga ‘e gālulue ai.

‘O lea polokalame ‘a le Matāgāluega ‘o Ā’oga, ‘e fa’aigoaina ‘o le School Onsite Training mā ‘o le ‘ā mafai ai ‘e faiā’oga fa’ata’ita’i ‘ona maua le avanoa ‘e gālulue fa’afaiā’oga ai ‘i totonu ‘o potu ā’oga mō aso ‘e tolu ‘o le vāiaso, ‘a’o tau fa’a’uma a lātou a’oa’oga mō le tusipasi fa’afaiā’oga.

‘E 147 le aofa’iga ‘o ‘i lātou sā aofia ai ‘i lea polokalame ‘i le tausaga ‘e 2024, ‘ae ‘o le tausaga nei 2026, ‘o lea ‘ua o’o ‘i le 528 le aofa’iga ‘o ‘i lātou ‘ua a’afia ai.

‘O le fa’alauteleina atu ‘o lenei polokalame, ‘o le ‘ā maua ai avanoa ‘e 660 mō le tausaga fou, ‘ae ‘o le ‘ā si’itia ‘i le 704 ‘i le tausaga, ‘āmata atu ‘i le tausaga ‘e 2028.

Na tā’ua fo’i ‘e le Minisitā ‘o Ā’oga, ‘ua mafai ‘ona fa’atūlaga lenei polokalame ‘ina ‘ia maua ai faiā’oga mō ā’oga ‘o lo’o aupito sili ‘ona mana’omia ni faiā’oga ‘i itū ‘ese’ese ‘o le atunu’u.

‘E ‘āmata ‘i le tausaga fou, 2027, ‘ona maua ‘e ‘i lātou ‘o le ‘ā a’oa’oaina ai ‘i lea polokalame ‘a le ‘Ōfisa ‘o Ā’oga, ‘ia se vaegātupe ‘e tusa ma le $20,660.00 ‘e fesoasoani ‘i le tau ‘o le a’oa’oga lenei, fa’apea ai ma le tausiga māsani.

Link to RNZ (Article): https://www.rnz.co.nz/news/politics/870524/government-spending-21-point-7m-to-expand-teacher-training-in-classrooms

IMAGE/ATA: RNZ / Samuel Rillstone